O‘zbekiston Respublikasi Ekologiya va iqlim o‘zgarishi milliy qo‘mitasi

“Barqaror tinchlik, taraqqiyot va farovonlik yo‘lida 25 yil birga” mavzusida o‘tkazilgan yig‘ilish global muammolar kuchayib borayotgan bir sharoitda ekologik hamkorlikni mustahkamlashga bag‘ishlandi. Xususan, iqlim o‘zgarishi, yer degradatsiyasi, suv tanqisligi, bioxilma-xillikning kamayishi hamda ekstremal tabiiy hodisalar sonining ortib borishi kabi muammolarga e’tibor qaratildi. Ushbu muammolar ShHT hududida barqaror rivojlanish va ekologik barqarorlikka jiddiy xavf tug‘dirayotgani ta’kidlandi.

Tadbirda nutq so‘zlagan Jusipbek Kazbekov Qirg‘iz Respublikasiga muvaffaqiyatli raislik qilgani hamda yig‘ilishning yuqori darajada tashkil etilgani uchun minnatdorlik bildirdi. Shuningdek, mintaqaviy hamkorlikni kuchaytirish, tajriba almashishni kengaytirish hamda atrof-muhitni muhofaza qilish va iqlim barqarorligi sohasida qo‘shma tashabbuslarni amalga oshirish muhimligini ta’kidladi.

O‘zbekiston tomoni mamlakatda amalga oshirilayotgan “yashil” transformatsiya jarayonlarini alohida qayd etdi. Jumladan, keng ko‘lamli o‘rmonlashtirish ishlari, ayniqsa, Orol dengizi qurigan tubida amalga oshirilayotgan loyihalar, shuningdek, har yili 200 million tup daraxt ekishni nazarda tutuvchi “Yashil makon” umummilliy tashabbusi hamda 2028-yilgacha botanika va dendrologiya bog‘lari tashkil etilishi tilga olindi. Bundan tashqari, “Toza havo”, “Chiqindisiz hudud”, “Ekologik madaniyat” va “Biomeros” kabi qator milliy loyihalar ham amalga oshirilmoqda.

Bundan tashqari, O‘zbekiston mintaqaviy ekologik hamkorlik platformasi sifatidagi rolini mustahkamlab borayotgani, jumladan, Samarqand shahrida yirik xalqaro tadbirlarni o‘tkazayotgani hamda Global ekologik fondning VIII Assambleyasi va "Eco Expo Central Asia 2026" tadbirlariga tayyorgarlik ko‘rayotgani qayd etildi.

Yig‘ilish doirasida O‘zbekiston tomonidan qator tashabbuslar ilgari surildi. Jumladan, ShHTga a’zo davlatlar o‘rtasida iqlim o‘zgarishi bo‘yicha Bitim loyihasi, Maxsus ishchi guruh tashkil etish, shuningdek, iqlimga moslashuv, dekarbonizatsiya va ekologik xavflarni prognozlashda sun’iy intellektdan foydalanishga qaratilgan mintaqaviy platformani ishga tushirish taklif etildi.