“2045-yilga qadar barqaror rivojlanish” bo‘yicha Vazirlar davra suhbati tashkil etildi
2025-02-12 12:10:00 / Vazirlik yangiliklari
Dubay shahrida bo‘lib o‘tayotgan Butunjahon hukumati sammiti (World Government Summit) doirasida “2045-yilga qadar barqaror rivojlanish” (XDGs 2045 ) bo‘yicha Vazirlar davra suhbati o‘tkazildi. Tadbirda O‘zbekiston Respublikasi Raqamli texnologiyalar vaziri Sherzod Shermatov ishtirok etdi.
Muhokamalar davomida raqamli texnologiyalar, IT ta’lim tizimi, sun’iy intellektning iqtisodiyot va bandlikka ta’siri hamda masofaviy ishlash imkoniyatlari kabi dolzarb mavzular muhokama qilindi.
Vazir o‘z chiqishida O‘zbekistonning raqamli texnologiyalar orqali ta’lim sifatini oshirish bo‘yicha amalga oshirilayotgan ishlar va kelgusidagi rejalar haqida so‘z yuritdi. Shuningdek, O‘zbekiston davlat boshqaruvi sohasidagi innovatsiyalar, shu jumladan, davlat organlarida malakali kadrlar uchun ish o‘rinlarini yaratish, davlat xizmatchilari malakasini oshirish, ularning faoliyatini baholash sohalarida elektron platformadan foydalanish hamda mazkur jarayonlarga sun’iy intellekt tizimidan foydalanish istiqbollariga to‘xtaldi.
Shu bilan birga, sun’iy intellektga asoslangan yangi sanoat tarmoqlarini rivojlantirish, startaplar va innovatsion tadbirkorlikni qo‘llab-quvvatlashning ahamiyatini alohida ta’kidladi.
Anjuman davomida global iqtisodiyotga integratsiya va texnologik yutuqlardan foydalanish orqali XDGs 2045 maqsadlariga erishish yo‘llari muhokama qilindi. O‘zbekistonning ilg‘or raqamli tashabbuslari va so‘nggi yillarda amalga oshirilgan islohotlari xalqaro ekspertlar tomonidan e’tirof etildi.