Assalomu alaykum, hurmatli kuzatuvchilar!

Avgust oyi yakunlari bo‘yicha Tashqi ishlar vazirligi faoliyatiga oid qisqacha brifingimizni taqdim etamiz. Mazkur oy O‘zbekiston tashqi siyosiy hayotida alohida dinamika, samarali muzokaralar va xalqaro maydondagi faol tashabbuslar bilan bilan ajralib turdi.

I. Dastlab, ikki tomonlama siyosiy tadbirlarga to‘xtaladigan bo‘lsak:

O‘tgan oy davomida mamlakatimiz tashqi siyosiy faoliyati izchil davom ettirilib, xalqaro maydondagi hamkorlik aloqalari yangi bosqichga ko‘tarildi. Shu davr mobaynida yurtimizga 40 dan ortiq yuqori darajadagi tashriflar amalga oshirildi. O‘zbekiston delegatsiyalarining esa xorijga 60 ga yaqin tashriflari ishlab chiqildi.

Mazkur tashriflar va muloqotlar O‘zbekistonning ishonchli hamkor sifatidagi obro‘sini yanada mustahkamlab, mamlakatimizning barqaror, uzoq muddatli va o‘zaro manfaatli hamkorlikka tayyor ekani, shuningdek, xalqaro tashabbuslarni ilgari surish borasidagi salohiyatini yana bir bor yaqqol namoyon etdi.

Xususan, 19-21-avgust kunlari Tashqi ishlar vaziri boshchiligidagi delegatsiya Bahrayn va Qatarga tashrif buyurdi.

Tashriflar doirasida delegatsiya Bahrayn hukumati rahbarlari va vazirlik vakillari, shuningdek mamlakat ishbilarmon doiralari bilan muzokaralar o‘tkazdi bo‘lsa, 21-avgust kuni Doha shahrida O‘zbekiston Respublikasi delegatsiyasi Qatar amiri tomonidan qabul qilindi, mamlakatlarimiz o‘rtasida Strategik sheriklik bo‘yicha Muvofiqlashtiruvchi kengashning birinchi yig‘ilishi bo‘lib o‘tdi. Tomonlar birodarlik aloqalarini yanada mustahkamlash hamda ko‘p qirrali hamkorlikni rivojlantirishga qat’iy sodiqligini yana bir bor tasdiqladilar. Tomonlar investitsiya va savdoni rivojlantirishni o‘z ichiga olgan iqtisodiy hamkorlikni kengaytirish bo‘yicha faol sa’y-harakatlarni davom ettirish zarurligini ta’kidladi. Ikki mamlakatning biznes imkoniyatlari to‘g‘risida ma’lumot almashish, o‘zaro savdo hajmini oshirish bo‘yicha qo‘shma choralarni amalga oshirish, ko‘rgazma va biznes forumlarini tashkil etish muhimligi qayd etildi.

Bundan tashqari, O‘zbekiston TIV rahbari mamlakatimizda bo‘lib o‘tgan tashriflar doirasida qator xorijiy davlatlar hamda xalqaro tashkilotlar rahbarlari bilan samarali muloqotlar o‘tkazdi.

Jumladan, mamlakatimizga rasmiy tashrif bilan kelgan Yaponiya tashqi ishlar vaziri Ivaya Takeshi bilan vazirliklar oʻrtasida Strategik dialog boʻyicha Qoʻshma kommyunike imzolandi. Ushbu hujjat siyosiy va iqtisodiy aloqalardan tortib, taʼlim va gumanitar sohalargacha boʻlgan barcha yoʻnalishlarda ikki tomonlama munosabatlarni mustahkamlashga xizmat qilishi barchamizni quvontiradi.

28-avgust kuni O‘zbekiston tashqi siyosat rahbari AQSh Prezidentining global hamkorlik bo‘yicha Maxsus vakili Paolo Zampolli bilan uchrashuv o‘tkazdi.

Mamlakatlarimiz o‘rtasida yanada mustahkam ko‘priklar qurish, ta’lim va madaniyatdan tortib, innovatsiya va biznesgacha bo‘lgan masalalar yuzasidan fikr almashildi. Bundan tashqari o‘tgan oy mobaynida TIV binosida Daniya, Ukraina,Tojikiston, Fransiya, Latviya kabi qator xorijiy davlatlarning mamlakatimizdagi Favqulodda va Muxtor elchilari qabul qilindi;

- Iordaniya Bosh vazir oʻrinbosari, tashqi ishlar va ekspatriatlar masalalari bo‘yicha vaziri Ayman Safadi

- Ozarbayjon tashqi ishlar vaziri Jeyhun Bayramov

- Turkiya tashqi ishlar vaziri Hakan Fidan

- YUNESKO Bosh direktori Odri Azule

- Rossiya Federatsiyasi tashqi ishlar vaziri Sergey Lavrov bilan telefon orqali muloqotlar bo‘lib o‘tdi.

Xususan, TIV rahbariyati tomonidan ham avgust oyi davomida 50 dan ortiq uchrashuv va muzokaralar tashkil etildi:

Jumladan, O‘zbekiston tashabbusi bilan 26-avgust kuni Markaziy Osiyo davlatlarining Afg‘oniston bo‘yicha maxsus vakillarining ilk uchrashuvi bo‘lib o‘tdi. Majlisda O‘zbekiston, Qozog‘iston, Qirg‘iziston va Tojikiston vakillari ishtirok etib, Markaziy Osiyo va Afg‘onistonning geostrategik o‘rni, tarixiy jihatdan bog‘liq madaniy va iqtisodiy makon, shuningdek, Yevrosiyoda barqarorlik, xavfsizlik va barqaror rivojlanishni ta’minlashga bo‘lgan umumiy manfaatlaridan kelib chiqib, Afg‘oniston masalasiga mustaqil yondashuvni rivojlantirish muhimligi ta’kidlandi.

II. Bundan tashqari, iqtisodiy diplomatiya yo‘nalishida ham izchil faoliyat olib borildi. avgust oyi davomida mamlakatimiz hududida 30 ga yaqin xalqaro va mintaqaviy tadbirlar tashkil etildi. Xususan, O‘zbekistonning chet eldagi diplomatik vakolatxonalari tashabbusi bilan xorijiy investitsiyalar oqimini ko‘paytirish, milliy eksportni kengaytirish va aniq sarmoyaviy loyihalarni amalga oshirish maqsadida yurtimiz hududlarida 6 ta, xorijiy mamlakatlarda esa 17 ta biznes-forumlar o‘tkazildi.

Shuningdek, xalqaro hamjamiyat vakillariga O‘zbekistonning iqtisodiy va investitsion salohiyati, xorijiy investorlar uchun yaratilgan qulay shart-sharoitlar, mamlakatimizning o‘ziga xos turistik imkoniyatlari va betakror madaniy merosini keng targ‘ib etishga qaratilgan 50 dan ortiq taqdimotlar namoyishi tashkil etildi.

Vazirligimiz tashabbusi bilan 10-avgust kuni Xorazm viloyatida investitsiya muhitini yaxshilash, mahalliy va chet el ishbilarmon doiralari o‘rtasidagi hamkorlikni mustahkamlash, savdo-iqtisodiy munosabatlarni yanada rivojlantirish maqsadida Xiva shahrida xalqaro biznes-forum hamda ikki va ko‘m tomonlama uchrashuvlar tashkil etilib, 30 ga yaqin Toshkentdagi diplomatik korpuslar va 40 dan ortiq kompaniya vakillarining ishtiroki ta’minlandi.

Shuningdek, o‘tgan bir oy ichida, xorijdagi diplomatik vakolatxonalar ishtirokida 50 dan ortiq yurtimizning eksportchi milliy korxonalariga xorijda hamkor topishga yordam ko‘rsatildi.

III. Xalqaro munosabatlarimizning shartnomaviy-huquqiy asoslarini mustahkamlash yo‘lida esa 24 xalqaro shartnoma va hujjatlar imzolandi. Bularning barchasi xalqaro miqyosda hamkorlik aloqalarimizni kengaytirishga qaratilgan.

Masalan, 26-avgust kuni ko‘hna Samarqand shahrida O‘zbekiston va Iordaniya o‘rtasida Viza talablarini bekor qilish to‘g‘risida bitim imzolanib, ushbu hujjat 30 kun ichida kuchga kiradi. Endilikda fuqarolarimiz 25-sentabrdan boshlab Iordaniyaga vizasiz sayohat qilishlari mumkin.

IV. Avgust oyida Tashqi ishlar vazirligi hamda mamlakatimizning xorijdagi diplomatik vakolatxonalari va konsullik muassasalari tomonidan O‘zbekiston fuqarolarining qonuniy huquq va manfaatlarini himoya qilish, vatandoshlar bilan muntazam muloqotni mustahkamlash borasida ham keng qamrovli ishlar amalga oshirildi.

Konsullik-huquqiy faoliyat doirasida:

 • 12,000 nafar O‘zbekiston fuqarosiga konsullik xizmatlari ko‘rsatildi;

 • chet elda mehnat faoliyati bilan shug‘ullanish istagini bildirgan 1048 nafar yurtdoshimizni ish bilan ta’minlashga ko‘maklashildi;

 • moddiy jihatdan og‘ir vaziyatga tushib qolgan 812 nafar fuqaromizga jami 385,281 AQSH dollari miqdorida moddiy yordam berildi;

 • vaqtincha saqlash muassasalarida bo‘lgan 125 nafar fuqaro ozod qilindi;

 • murakkab sharoitdagi ishsiz, voyaga yetmagan yoki boquvchisiz qolgan 390 nafar yurtdoshimiz, shuningdek, odam savdosi qurboni bo‘lgan 31 nafar fuqaro Vatanimizga qaytarildi.

Xorijdagi vatandoshlarimiz ishtirokida 120 dan ortiq madaniy-ma’rifiy tadbirlar o‘tkazilib, ularga mingga yaqin vatandoshlarimiz jalb etildi. Shu davrda jismoniy va yuridik shaxslardan 11,118 ta murojaat qabul qilindi. Ulardan 10,013 tasi Vazirlik Konsullik-huquqiy departamenti hamda mas’ul tashkilotlar tomonidan hal etildi, qolgan 1,105 tasi esa tegishli manzillarga yo‘naltirildi. Barcha murojaatlar belgilangan tartibda ko‘rib chiqilib, murojaatchilarga o‘z vaqtida zarur konsullik-huquqiy yordami ko‘rsatildi.

Tashqi ishlar vazirligi ijtimoiy tarmoqlar va ommaviy axborot vositalarida tarqalayotgan ma’lumotlarni muntazam ravishda kuzatib boradi hamda aniqlangan holatlar yuzasidan tegishli choralar ko‘rish maqsadida xorijiy mamlakatlarning vakolatli idoralari bilan yaqin hamkorlik qiladi.

Xususan, avgust oyida keng muhokamalarga sabab bo‘lgan holat yuzasidan ham surishtiruv ishlari olib borilmoqda. Shu munosabat bilan Rossiya Tashqi ishlar vazirligiga mazkur videodagi shaxsni aniqlash va unga nisbatan qonuniy choralar ko‘rish maqsadida rasmiy nota yuborildi.

Hurmatli vatandoshlar! Sizlarga yana bir bor eslatib o‘tamiz: O‘zbekiston fuqarolari dunyoning qaysi nuqtasida bo‘lishidan qat’i nazar, davlatimiz himoyasida hisoblanadi. Agar huquq va erkinliklaringiz, qonuniy manfaatlaringiz yoki sha’ningiz xorijda buzilsa, darhol o‘sha mamlakatning vakolatli huquqni muhofaza qiluvchi organlariga, shuningdek, O‘zbekistonning diplomatik vakolatxonalari yoki konsullik muassasalariga murojaat qilishingizni so‘raymiz.

Shuningdek, bir oy davomida chet el fuqarolari uchun O‘zbekistonga kirish bo‘yicha 21,219 ta viza rasmiylashtirildi. Shulardan 157 tasi to‘g‘ridan-to‘g‘ri Konsullik-huquqiy departamenti tomonidan taqdim etildi.

Hurmatli kuzatuvchilar,

Avgust oyida amalga oshirilgan barcha tashabbus va erishilgan natijalar O‘zbekistonning izchil va faol tashqi siyosatining, xalqaro hamkorlikka ochiqligining hamda milliy manfaatlarni qat’iy himoya qilish yo‘lidagi sadoqatining yorqin tasdig‘idir.

Tashqi ishlar vazirligi uchun ustuvor vazifa - O‘zbekistonning xalqaro nufuzini yanada yuksaltirish, strategik sheriklikni mustahkamlash va har bir vatandoshimizning huquq va manfaatlarini munosib himoya qilishdan iboratdir.

O‘tgan bir oylik faoliyatimiz sarhisobiga bag‘ishlangan brifing so‘ngida fursatdan foydalanib barchangizni O‘zbekiston mustaqilligining 34 yilligi bilan Tashqi ishlar vazirligi nomidan samimiy muborakbod etamiz.

Zero, mustaqillik - bizning milliy davlatchiligimizning tayanchi, tashqi siyosatimizning mustahkam asosi va xalqaro hamjamiyat bilan samarali hamkorlik qilishimizning kafolatidir.

Yangi O‘zbekistonning xalqaro maydondagi nufuzi yanada ortib, mamlakatimiz diplomatiyasi xalqimiz farovonligi va Vatanimiz ravnaqi yo‘lida xizmat qilishda bardavom bo‘lsin!

E’tiboringiz uchun rahmat!