O‘zbekiston delegatsiyasining Primorye o‘lkasi gubernatori O.Kojemyako bilan uchrashuvi bo‘lib o‘tdi
2025-07-01 10:05:00 / Yangiliklar va voqealar
Joriy yilning 30-iyun kuni O‘zbekiston delegatsiyasining Primorye o‘lkasiga tashrifi doirasida o‘lka gubernatori O.Kojemyako, xalqaro va tashqi iqtisodiy aloqalar vaziri K.Sidorenko, qurilish vaziri A.Moskalyov, mehnat va ijtimoiy siyosat vaziri S.Krasitskiy, ta’lim vaziri S.Shamonova, qishloq xo‘jaligi vaziri A.Bronets, sanoat va savdo vaziri S.Kalitin, turizm vaziri N.Naboychenko, shuningdek, Migratsiya siyosati agentligi rahbari M.Sorokin va Rossiya TIVning Vladivostokdagi vakolatxonasi rahbari A.Brovarets bilan uchrashuvlar bo‘lib o‘tdi.
Muzokaralar chog‘ida ikki tomonlama hamkorlikni rivojlantirish, fuqarolarimizning huquq va manfaatlarini ta’minlash, mehnat migrantlarining ketishdan oldingi tayyorgarligini yo‘lga qo‘yish, O‘zbekistonda Rossiya o‘quv markazlarini ochish, shuningdek, qo‘shma targ‘ibot-tashviqot tadbirlarini o‘tkazish masalalari muhokama qilindi.
Shuningdek, delegatsiya Tashqi iqtisodiy aloqalar vazirligi va Migratsiya siyosati agentligi rahbariyati bilan maslahatlashuvlar o‘tkazdi.
Shu kuning o’zida O.Kojemyako ishtirokida Primorye o‘lkasida mehnat faoliyatini amalga oshirayotgan vatandoshlar bilan uchrashuv o‘tkazildi. Muloqot davomida fuqarolarimizni qiziqtirgan savollarga javob berildi.