Chexiya Respublikasining Favqulodda va Muxtor Elchisi bilan uchrashuv bo‘lib o‘tdi
2025-05-16 17:35:00 / Yangiliklar va voqealar
2025-yil 16-may kuni O‘zbekiston tashqi ishlar vaziri maslahatchisi Munira Aminova Chexiya Respublikasining O‘zbekistondagi Favqulodda va Muxtor Elchisi Lubomir Frebort bilan uchrashuv o‘tkazdi.
Uchrashuvda tomonlar O‘zbekistonning Pragada elchixonasi ochilishi muhimligini, bu ikki davlat o‘rtasidagi siyosiy, iqtisodiy va madaniy aloqalarni kengaytirishda muhim qadam bo‘lishini ta’kidladilar. O‘zbekiston iqtisodiyotining turli tarmoqlari, jumladan, farmatsevtika, mashinasozlik, qishloq xo‘jaligi va transport sohalariga chex sarmoyalarini ko‘paytirish istiqbollari muhokama qilindi.
Ikki tomonlama iqtisodiy aloqalarni rivojlantirishga alohida e’tibor qaratildi; Xususan, chex kompaniyalari O‘zbekiston transport infratuzilmasini modernizatsiya qilishda, jumladan, Toshkent metropolitenini takomillashtirish va Urganchda tramvay yo‘nalishlarini rivojlantirish loyihalarida ishtirok etishga tayyorligini bildirdi.
Elchi, shuningdek, turizm sohasini rivojlantirishga qiziqish bildirar ekan, Toshkent va Karlovi Vari o‘rtasida haftada bir marta amalga oshiriladigan to‘g‘ridan-to‘g‘ri reys mavjudligini ta’kidladi. Bu esa Chexiya Respublikasiga tashrif buyurishni xohlovchi O‘zbekiston fuqarolari uchun yangi imkoniyatlar ochib, mamlakatlar o‘rtasidagi madaniy va iqtisodiy aloqalarni mustahkamlashga xizmat qilmoqda.
Tomonlar o‘zaro hamkorlikning turli yo‘nalishlarida faol aloqalarni davom ettirish niyatida ekanliklarini bildirdilar.