O‘zbekiston va Belarus tashqi ishlar vazirliklari o‘rtasidagi siyosiy maslahatlashuvlar to‘g‘risida
2025-03-25 18:05:00 / Yangiliklar va voqealar
2025-yilning 25-mart kuni Toshkent shahrida O‘zbekiston Respublikasi va Belarus Respublikasi Tashqi ishlar vazirliklari o‘rtasidagi siyosiy maslahatlashuvlarning navbatdagi raundi bo‘lib o‘tdi.
Delegatsiyalarga ikki davlat tashqi ishlar vaziri oʻrinbosarlari Bobur Usmonov va Pavel Utyupin boshchilik qildi.
Siyosiy, savdo-iqtisodiy va madaniy-gumanitar sohalardagi har tomonlama hamkorlikning bugungi holati va uni rivojlantirish istiqbollari atroflicha muhokama qilindi. Oliy va yuqori darajadagi tashriflar chog‘ida belgilangan vazifalar ijrosining borishi ko‘rib chiqildi.
Tomonlar turli darajadagi faol aloqalar, o‘zaro savdo hajmi izchil o‘sib borayotgani, sanoatning ustuvor tarmoqlarida qo‘shma loyihalar amalga oshirilayotganini mamnuniyat bilan qayd etdilar.
Parlamentlararo aloqalarni mustahkamlash, ikki tomonlama hamkorlikning shartnomaviy-huquqiy bazasini kengaytirish va ko‘p tomonlama platformalarda o‘zaro manfaatli hamkorlikni oshirish bo‘yicha umumiy majburiyat tasdiqlandi.
Savdo, sanoat kooperatsiyasi, qishloq xo‘jaligi, turizm, ta’lim va sog‘liqni saqlash sohalarida mavjud salohiyatdan foydalanishga alohida e’tibor qaratilmoqda.
Maslahatlashuvlar davomida joriy yilda rejalashtirilgan qoʻshma tadbirlar, jumladan, Hukumatlararo komissiyaning navbatdagi yigʻilishi, hududlararo, biznes, taʼlim va tibbiyot forumlari, shuningdek, bir qator madaniy dasturlarni oʻtkazish rejalari kelishib olindi.
Ikki tomonlama kun tartibidagi keng koʻlamli masalalar boʻyicha amaliy hamkorlikni mustahkamlash maqsadida tashqi ishlar vazirliklari oʻrtasida yaqin hamkorlikni davom ettirish boʻyicha kelishuvga erishildi.