28 yanvar kuni Oʻzbekiston tashqi ishlar vaziri o‘rinbosari Olimjon Abdullayev Riga shahrida Latviya tashqi ishlar vaziri Bayba Braje va Tashqi ishlar vazirligi direksiyasi bosh direktori Agnese Kalninya bilan uchrashdi.

Muzokaralar chogʻida Oʻzbekiston fuqarolari uchun viza rejimini yengillashtirish masalalarini oʻzida aks ettiruvchi Migratsiya toʻgʻrisidagi Bitim loyihasini kelgusida imzolash istiqbollari bilan koʻrib chiqish masalasi muhokama qilindi.

Tomonlar bu boradagi hamkorlik va mehnat migratsiyasi sohasida doimiy muloqotni yo‘lga qo‘yish, jumladan, muntazam maslahatlashuvlar o‘tkazish muhimligini qayd etdilar.

Xorijiy tomon O‘zbekiston Latviyaning Markaziy Osiyo mintaqasidagi muhim hamkori ekanini alohida ta’kidladi.

Ikki mamlakatning mehnat migratsiyasi sohasidagi hamkorligi har ikki tomon uchun ham manfaatli va aniq uzoq muddatli istiqbolga ega ekanligiga ishonch bildirildi.

Tomonlar joriy yilda Tashqi ishlar vazirligining tegishli boshqarmalari o‘rtasida konsullik maslahatlashuvlarini o‘tkazish zarurligiga kelishib oldilar.