Rostov viloyatida hududlararo hamkorlik va O‘zbekiston fuqarolarining manfaatlarini himoya qilish masalalari muhokama qilindi
2026-09-03 21:00:00 / Yangiliklar va voqealar
Rostov viloyatiga ishchi tashrif doirasida viloyat gubernatori Yu.B. Slyusar bilan uchrashuv bo‘lib o‘tdi. Unda savdo-iqtisodiy va investitsiyaviy hamkorlikni kengaytirish, sanoat kooperatsiyasini rivojlantirish, shuningdek, O‘zbekiston hududlari bilan to‘g‘ridan-to‘g‘ri aloqalarni yanada mustahkamlash istiqbollari muhokama qilindi.
Mehnat mobilligi masalalariga, shuningdek, O‘zbekiston fuqarolari uchun zarur ruxsat beruvchi hujjatlarni rasmiylashtirish mexanizmlarini takomillashtirishga alohida e’tibor qaratildi. Mehnat patentlarini olish tartib-taomillarini soddalashtirish bilan bog‘liq masalalarni muhokama qilish maqsadida Rossiya Ichki ishlar vazirligining Rostov viloyati bo‘yicha Bosh boshqarmasi rahbariyati ishtirokida alohida ishchi yig‘ilish o‘tkazish bo‘yicha kelishuvga erishildi.
Shuningdek, Rostov viloyati delegatsiyasining 2027-yil mart oyida O‘zbekistonga tashrifini tayyorlash masalasi muhokama qilindi. Rossiya tomoni delegatsiya tarkibiga viloyatdagi qator sanoat korxonalari vakillarini kiritishdan manfaatdor ekanini bildirdi. Bu to‘g‘ridan-to‘g‘ri ishbilarmonlik aloqalarini o‘rnatish va qo‘shma loyihalarni ishlab chiqish imkonini beradi.
Rostov viloyatining Inson huquqlari bo‘yicha vakili A.I. Xarkovskiy bilan uchrashuv davomida O‘zbekiston fuqarolarining qonuniy huquq va manfaatlarini himoya qilish masalalari atroflicha ko‘rib chiqildi. Yurtdoshlar mehnat qilayotgan korxonalar va obyektlarga Inson huquqlari bo‘yicha vakil apparatining biriktirilgan vakili ishtirokida qo‘shma tashriflarni amalga oshirish bo‘yicha kelishuvga erishildi.
Shuningdek, qariyb 100 nafar O‘zbekiston fuqarosi mehnat faoliyatini olib borayotgan “SSK AVAKON” MChJda yurtdoshlar bilan uchrashuv o‘tkazildi. Asosiy e’tibor konsullik-huquqiy himoyani ta’minlash, ularning qonuniy huquq va manfaatlarini himoya qilish, shuningdek, migratsiya va mehnat qonunchiligiga rioya etish masalalariga qaratildi. Fuqarolarga zarur tushuntirishlar berilib, amaliy tavsiyalar taqdim etildi.
Uchrashuvlar yakunida hududlararo hamkorlikni rivojlantirish, tashkil etilgan mehnat mobilligini takomillashtirish hamda O‘zbekiston fuqarolarining huquq va manfaatlarini izchil himoya qilish maqsadida amaliy hamkorlikni davom ettirishga tayyorlik tasdiqlandi.