Oʻzbekiston Respublikasi Prezidenti Shavkat Mirziyoyev Janobi Oliylarining taklifiga binoan, Hindiston Respublikasi Bosh vaziri Narendra Modi Janobi Oliylari 2026-yil 29 – 30-avgust kunlari Oʻzbekiston Respublikasiga davlat tashrifi amalga oshirdi.

2. Oʻzbekiston Respublikasi Prezidenti Shavkat Mirziyoyev va Hindiston Respublikasi Bosh vaziri Narendra Modi iliq, doʻstona va konstruktiv ruhda muzokaralar oʻtkazdilar. Rahbarlar Oʻzbekiston – Hindiston ikki tomonlama munosabatlarining bugungi holati va istiqbollarini har tomonlama koʻrib chiqdilar, dolzarb mintaqaviy va xalqaro masalalar yuzasidan fikr almashdilar hamda amaliy hamkorlikni yanada rivojlantirishning ustuvor yoʻnalishlarini belgiladilar.

3. Rahbarlar Oʻzbekiston Respublikasi va Hindiston Respublikasi oʻrtasidagi hamkorlikning yuksak darajada ekanidan mamnunligini bildirdilar. Ular ikki mamlakat oʻrtasidagi munosabatlar koʻp asrlik doʻstlik rishtalari hamda ikki xalqni bogʻlab turadigan mushtarak tarixiy va madaniy yaqinlik asoslanganini qayd etdilar. Oʻzaro qatʼiy irodalarini yana bir bor tasdiqlagan holda, Rahbarlar ikki tomonlama aloqalarni yanada chuqurlashtirish va hamkorlikni ikki mamlakatning asosiy manfaatlariga xizmat qiladigan Keng qamrovli strategik sheriklik darajasiga olib chiqishga sodiqliklarini taʼkidladilar.

4. Rahbarlar pozitsiyalarning oʻzaro yaqinligini hamda Markaziy Osiyoning ahamiyati tobora ortib borayotganini mamnuniyat bilan olqishladilar. Murakkab geosiyosiy vaziyat sharoitida ular erkin, ochiq va qoidalarga asoslangan xalqaro tartibni taʼminlash zarurligini taʼkidladilar. Koʻp tomonlama hamkorlik, Strategik sheriklik va ikki tomonlama kelishuvlarga tayangan holda, ular ikki xalq va kelajak avlodlar manfaatlariga javob beradigan uzoq muddatli, oʻzaro manfaatli hamkorlikka sodiqliklarini yana bir bor tasdiqlab, siyosiy muloqot va Strategik sheriklikni savdo, iqtisodiyot va investitsiyalar, transport oʻzaro bogʻliqligi, raqamli transformatsiya (axborot texnologiyalari, sunʼiy intellekt, kosmik faoliyat va kiberxavfsizlik), energetika transformatsiyasi, muhim minerallar, oziq-ovqat xavfsizligi, sogʻliqni saqlash, farmatsevtika va taʼlim sohalarida keng qamrovli strategik sheriklikni yanada chuqurlashtirishga kelishib oldilar.

Siyosiy, parlamentlararo va xavfsizlik sohasidagi hamkorlik

5. Rahbarlar oliy va yuqori darajadagi muntazam va oʻzaro ishonchga asoslangan muloqotni saqlab qolish muhimligini taʼkidlab, ikki tomonlama hamda xalqaro tadbirlar doirasidagi tashriflar va aloqalar almashinuvini davom ettirishga kelishib oldilar.

6. Rahbarlar ikki mamlakat oʻrtasida erishilgan kelishuv
va bitimlarni amalga oshirishni yuqori darajada muvofiqlashtirish va nazorat qilish, shuningdek, ikki tomonlama ustuvor tashabbus va loyihalarni oʻz vaqtida roʻyobga chiqarishga koʻmaklashish maqsadida tashqi ishlar vazirlari raisligidagi muvofiqlashtiruvchi mexanizmni tashkil etishga kelishib oldilar.

7. Rahbarlar parlament diplomatiyasining tobora ortib borayotgan rolini eʼtirof etgan holda, Oʻzbekiston Respublikasi Oliy Majlisi palatalari hamda Hindiston Respublikasi Parlamenti oʻrtasidagi aloqalar, jumladan, parlamentlararo doʻstlik guruhlari oʻrtasidagi hamkorlik va xalqaro parlamentlararo tashkilotlar doirasidagi oʻzaro hamkorlik faollashganini mamnuniyat bilan qayd etdilar.

8. Rahbarlar ikki tomonlama hamkorlikning turli sohalardagi shartnomaviy-huquqiy bazasini yanada mustahkamlash muhimligini taʼkidladilar. Ular mavjud ikki tomonlama xalqaro-huquqiy hujjatlarni hamkorlikning amaldagi ustuvor yoʻnalishlariga toʻliq muvofiqligini taʼminlash nuqtayi nazaridan har tomonlama qayta koʻrib chiqish zarurligini taʼkidlab, shartnomaviy-huquqiy bazani bugungi voqelikka muvofiq ravishda modernizatsiya qilish boʻyicha birgalikda ish olib borishga kelishib oldilar.

9. Rahbarlar transchegaraviy terrorizm va uning barcha shakl va koʻrinishlarini qatʼiy qoraladilar, terrorizmga nisbatan mutlaq toqatsizlik (“nol darajali murosasizlik”) pozitsiyalarini yana bir bor tasdiqladilar va terrorizmni hech qanday asos bilan oqlashni rad etdilar. Rahbarlar terrorchilik tuzilmalariga qarshi muvofiqlashtirilgan choralarni koʻrish, terrorizmni moliyalashtirish tarmoqlari, xavfsiz boshpanalari va infratuzilmasini bartaraf etishga chaqirdilar. Ular terrorizm uchun masʼul shaxslar javobgarlikka tortilishi, uning ijrochilari, homiylari, koʻmaklashganlar va ular bilan aloqador boʻlgan tuzilmalar qonun oldida javob berishi lozimligini taʼkidladilar. Rahbarlar huquqni muhofaza qiluvchi organlar oʻrtasidagi hamkorlikni kuchaytirish, tezkor va razvedka axboroti almashinuvini yoʻlga qoʻyish, zoʻravon ekstremizm, narkotik moddalarning noqonuniy aylanmasi, uyushgan jinoyatchilik va kibertahdidlarga qarshi kurashish muhimligini taʼkidladilar. Rahbarlar Terrorizmga qarshi kurashish boʻyicha Qoʻshma ishchi guruh doirasidagi hamkorlikni davom ettirish muhimligini yana bir bor tasdiqladilar.

10. Rahbarlar Oʻzbekiston va Hindistonning mudofaa va xavfsizlik sohasidagi tegishli idoralari oʻrtasida muntazam almashinuvlar, institutsional mexanizmlar, salohiyatni oshirish chora-tadbirlari va qoʻshma faoliyat orqali amalga oshirilayotgan hamkorlik va yaqin muvofiqlashuvni yuqori baholadilar hamda umumiy xavfsizlik muammolariga qarshi kurashishda ushbu hamkorlikni yanada mustahkamlashga sodiqliklarini bildirdilar. Rahbarlar Harbiy hamkorlik boʻyicha Qoʻshma ishchi guruh faoliyatini yuqori baholab, uning doirasida mudofaa sanoati sohasida hamkorlikning yangi yoʻnalishlari oʻrganilayotganini qayd etdilar. Ular 2026-yil aprel oyida Oʻzbekistonning Namangan viloyatida oʻtkazilgan Oʻzbekiston–Hindiston qoʻshma harbiy mashgʻulotlari – “Doʻstlik”ning muvaffaqiyatli oʻtkazilganini mamnuniyat bilan qayd etdilar.

11. Rahbarlar mintaqaviy hamkorlikni rivojlantirish borasida erishilgan sezilarli natijalarni yuqori baholab, “Markaziy Osiyo – Hindiston” formati doirasida davlat rahbarlari va boshqa darajalardagi hamkorlikni yanada mustahkamlashga sodiqliklarini tasdiqladilar. Shuningdek, Rahbarlar mintaqaviy masalalar boʻyicha muntazam maslahatlashuvlarni davom ettirish muhimligini taʼkidladilar.

Savdo-iqtisodiy va investitsiyaviy hamkorlik

12. Rahbarlar Oʻzbekiston va Hindiston oʻrtasidagi mustahkam iqtisodiy sheriklikni mamnuniyat bilan qayd etib, ikki tomonlama savdo va investitsiyalarni yanada kengaytirish uchun hali toʻliq ishga solinmagan katta salohiyat mavjudligini taʼkidladilar.

13. Rahbarlar yangi imkoniyatlarni aniqlash va ulardan samarali foydalanish orqali ikki tomonlama savdoni kengaytirish va diversifikatsiya qilish muhimligiga kelishib oldilar. Ular Oʻzbekistonda faoliyat yuritayotgan Hindiston kompaniyalari sonining jadal oʻsishi iqtisodiy hamkorlikni yanada kengaytirish uchun katta salohiyat mavjudligidan dalolat berishini taʼkidladilar.

14. Har ikki tomon mamlakatlar oʻrtasida savdo qilinadigan tovarlar turini kengaytirish, notarif toʻsiqlarni bartaraf etish hamda sanoat kooperatsiyasini rivojlantirish maqsadida ikki tomonlama tovar ayirboshlash hajmini yanada oshirishga qaratilgan qoʻshma chora-tadbirlarni amalga oshirishga kelishib oldilar. Ular ikki tomonlama savdoning asosiy tarmoqlariga alohida eʼtibor qaratgan holda, notarif choralar
va investitsiyaviy toʻsiqlar bilan bogʻliq masalalarni hal etish boʻyicha Qoʻshma ishchi guruh tashkil etishga qaror qildilar.

15. Har ikki tomon elektron tijorat, savdo tartib-taomillarini raqamlashtirish, shuningdek, kichik va oʻrta biznes subyektlarini qoʻllab-quvvatlash hamda ikki tomonlama savdoni yengillashtirishga xizmat qiluvchi raqamli platformalarni joriy etish sohalarida hamkorlikni mustahkamlashdan manfaatdor ekanliklarini bildirdilar.

16. Oʻzbekiston tomoni Hindiston tomonining Oʻzbekiston Respublikasining Jahon savdo tashkilotiga aʼzo boʻlish jarayonini qoʻllab-quvvatlaganini yuqori baholadi. Har ikki tomon Jahon savdo tashkiloti markaziy oʻrin tutadigan koʻp tomonlama savdo tizimini, xususan, rivojlanayotgan mamlakatlar manfaatlarini taʼminlash maqsadida saqlash va himoya qilish boʻyicha birgalikda ish olib borishga kelishib oldilar.

17. Har ikki tomon ishlab chiqarish va eksport salohiyatini mustahkamlashga qaratilgan saʼy-harakatlarni qoʻllab-quvvatlash, tartibga soluvchi organlar oʻrtasida muloqotni rivojlantirish hamda oʻzaro bozorlarga yanada tezkor va keng kirish imkonini yaratish maqsadida oʻzaro tan olish mexanizmlarini ishlab chiqish imkoniyatlarini oʻrganishga kelishib oldilar.

18. Rahbarlar 2026-yil iyun oyida Toshkent xalqaro investitsiya forumi doirasida hamda 2026-yil avgust oyida Nyu-Dehli shahrida oʻtkazilgan Savdo, iqtisodiy, ilmiy-texnikaviy hamkorlik boʻyicha Hukumatlararo komissiya yigʻilishi va Oʻzbekiston–Hindiston biznes forumlarining natijalarini yuqori baholadilar hamda ularning ikki mamlakat oʻrtasidagi savdo-iqtisodiy va investitsiyaviy hamkorlikni yanada kengaytirishga qoʻshgan muhim hissasini qayd etdilar.

19. Rahbarlar Oʻzbekiston va Hindiston kompaniyalari oʻrtasidagi hamkorlikni rivojlantirish, ikki iqtisodiyotning oʻzaro toʻldiruvchi imkoniyatlaridan samarali foydalanish hamda qoʻshilgan qiymat yaratish zanjirlari oʻrtasidagi oʻzaro bogʻliqlikni mustahkamlashga kelishib oldilar.

20. Har ikki tomon elektrotexnika mahsulotlari, mashinasozlik mahsulotlari, avtomobilsozlik va farmatsevtika sohalarida ikki tomonlama savdoni kengaytirish uchun katta salohiyat mavjudligini eʼtirof etib, mazkur yoʻnalishlarda biznes subyektlari oʻrtasidagi hamkorlikni yanada kuchaytirishga kelishib oldilar.

21. Rahbarlar oʻzaro manfaatli investitsiya imkoniyatlarini aniqlash va ilgari surish, investorlarning muammolari va murojaatlarini koʻrib chiqish hamda tadbirkorlik faoliyati uchun qulay sharoitlarni taʼminlash maqsadida institutsional mexanizmni yoʻlga qoʻyishga kelishib oldilar.

22. Har ikki tomon Oʻzbekiston Investitsiyalarni jalb qilish agentligi va “Invest India” oʻrtasida hamkorlikni yanada kengaytirish imkoniyatlarini oʻrganishga kelishib oldilar. Mazkur hamkorlik oʻzaro manfaatli investitsiya imkoniyatlarini aniqlash va ilgari surish, shu jumladan, qoʻshma biznes forumlari, roud-shoular, investitsiya seminarlari va manfaatdor tomonlar bilan muloqotlar oʻtkazish orqali ikki tomonlama investitsiya oqimlarini koʻpaytirish va biznes doiralari oʻrtasidagi aloqalarni mustahkamlashga qaratilgan.

23. Rahbarlar ikki tomonlama savdoning izchil oʻsib borayotganidan mamnuniyat bildirib, savdo munosabatlarini yanada mustahkamlash maqsadida uni kengaytirish va diversifikatsiya qilishga qatʼiy intilishlarini yana bir bor tasdiqladilar. Oʻzbekiston–Hindiston imtiyozli savdo toʻgʻrisidagi bitimi boʻyicha Qoʻshma texnik-iqtisodiy asoslash tadqiqoti yakunlanganini qayd etgan holda, Rahbarlar tegishli vazirliklarga keyingi chora-tadbirlarni belgilangan muddatlarda koʻrib chiqish vazifasini yukladilar.

Energetika, tabiiy resurslar va taʼminot zanjirlari

24. Rahbarlar qayta tiklanuvchi energetika, energetika infratuzilmasini modernizatsiya qilish va istiqbolli investitsiya loyihalarini amalga oshirish sohalarida hamkorlikni ilgari surish boʻyicha oʻtkazilgan muhokamalarni mamnuniyat bilan olqishladilar.

25. Rahbarlar geologiya, konchilik, atom energetikasi, sanoat kooperatsiyasi, shuningdek, muhim va strategik minerallar sohalarida hamkorlik imkoniyatlarini oʻrganishga kelishib oldilar. Bunda mineral resurslarni qayta ishlash, qoʻshilgan qiymatli mahsulotlar ishlab chiqarish va qayta ishlash tashabbuslarini amalga oshirishga alohida eʼtibor qaratiladi. Ular, shuningdek, Hindiston kompaniyalarining Oʻzbekistondagi istiqbolli mineral konlarini oʻzlashtirish jarayonlarida, Oʻzbekiston korxonalarining esa Hindistondagi qoʻshma hamkorlik loyihalarida ishtirokini ragʻbatlantirishdan manfaatdor ekanliklarini bildirdi. Rahbarlar atom energiyasidan tinch maqsadlarda foydalanish sohasida hamkorlikni kengaytirishga qiziqish bildirdilar.

26. Rahbarlar geologik qidiruv, konlarni oʻzlashtirish, mineral xom ashyoni qayta ishlash va integratsiyalashgan qiymat zanjirlarini rivojlantirish boʻyicha qoʻshma loyihalarni amalga oshirish orqali muhim minerallar sohasidagi hamkorlikni kengaytirishga kelishib oldilar.

Qishloq xoʻjaligi

27. Rahbarlar qishloq xoʻjaligida qiymat zanjirlarini rivojlantirish, eksport salohiyatini mustahkamlash hamda qishloq xoʻjaligi va chorvachilik sohalarining texnik salohiyatini oshirish boʻyicha hamkorlik qilishga kelishib oldilar.

28. Rahbarlar qishloq xoʻjaligi va oziq-ovqat xavfsizligi sohalaridagi hamkorlikni, xususan, innovatsiyalar va resurslarni tejovchi texnologiyalarga alohida eʼtibor qaratgan holda, mustahkamlashga sodiqliklarini tasdiqladilar. Ular, shuningdek, qishloq xoʻjaligi fani sohasida almashinuvlarni davom ettirish hamda mintaqada zamonaviy va barqaror qishloq xoʻjaligini rivojlantirish maqsadida koʻp tomonlama va mintaqaviy platformalardan samarali foydalanishga kelishib oldilar. Rahbarlar qishloq xoʻjaligi mahsulotlari oʻzaro savdosini yengillashtirishga kelishib oldilar.

29. Rahbarlar qishloq xoʻjaligi mahsuldorligini oshirish, shuningdek, oʻsimliklarning genetik resurslarini saqlash va ulardan barqaror foydalanish borasida ilmiy-tadqiqot muassasalari va korxonalar oʻrtasidagi hamkorlikni kengaytirishni qoʻllab-quvvatladilar.

Transport, logistika va oʻzaro bogʻliqlik

30. Rahbarlar multimodal transport yoʻnalishlari va logistika koridorlarini rivojlantirish, tovarlarni uzluksiz tashish uchun qulay shart-sharoitlar yaratish orqali Oʻzbekiston va Hindiston oʻrtasidagi transport-logistika oʻzaro bogʻliqligini yaxshilashga qaratilgan qoʻshma saʼy-harakatlarni davom ettirishga sodiqliklarini tasdiqladilar.

31. Rahbarlar tashish xarajatlarini qisqartirish maqsadida yuk tashish hajmlarini tiklashga qaratilgan hamkorlikni davom ettirish niyatini tasdiqladilar.

32. Rahbarlar ilgʻor texnologiyalardan foydalangan holda avtomobil yoʻllari qurilishi sohasida tajriba almashish orqali tegishli organlar oʻrtasidagi hamkorlikni kengaytirish niyatini bildirdilar hamda avtomobil yoʻllari infratuzilmasini rekonstruksiya qilish va modernizatsiyalash boʻyicha qoʻshma loyihalarni amalga oshirish imkoniyatlarini oʻrganishga kelishib oldilar.

33. Rahbarlar Oʻzbekiston jamoat transporti sohasida ekologik jihatdan toza va energiya samaradorligi yuqori boʻlgan yechimlarni ishlab chiqish muhimligini eʼtirof etdilar hamda ushbu sohada qoʻshma loyihalarni amalga oshirish imkoniyatlarini oʻrganishga kelishib oldilar.

Raqamli texnologiyalar, innovatsiyalar va kosmik sohadagi hamkorlik

34. Rahbarlar 2019-yilda Hindiston modeli asosida Hindistonning Dasturiy taʼminot texnologiyalari parklari (STPI)ning faol koʻmagida tashkil etilgan Toshkentdagi birinchi IT Parkning muvaffaqiyatli faoliyat yuritayotganini mamnuniyat bilan qayd etdilar hamda ikki mamlakatning texnologik parklari, kompaniyalari, startaplari va taʼlim muassasalari oʻrtasidagi sheriklikni yanada kengaytirishga kelishib oldilar.

35. Rahbarlar yuqori texnologiyalar va raqamli transformatsiya sohalarida ikki tomonlama hamkorlik mustahkamlanayotganini mamnuniyat bilan qayd etdilar, shuningdek, 2026-yil fevral oyida Nyu-Dehli shahrida oʻtkazilgan Hindiston sunʼiy intellekt taʼsiri sammiti doirasida erishilgan kelishuvlarni amalga oshirishni olqishladilar.

36. Rahbarlar xavfsiz, himoyalangan va ishonchli sunʼiy intellekt (SI) tizimlarini ishlab chiqish va rivojlantirish sohasida hamkorlikni, jumladan, tajriba va eng yaxshi amaliyotlar almashinuvi orqali mustahkamlashga kelishib oldilar. Bunda barqaror iqtisodiy oʻsishni, innovatsiyalarga asoslangan taraqqiyotni ragʻbatlantirish hamda jamiyat oldidagi muammolarni samarali hal etishda sunʼiy intellekt salohiyatidan foydalanish koʻzda tutiladi.

37. Rahbarlar kosmik makonni tadqiq etish va undan tinch maqsadlarda foydalanish sohasida, shu jumladan, kosmik texnologiyalardan amaliy foydalanish, ilmiy maʼlumotlar almashinuvi, qoʻshma seminarlar va treninglar orqali salohiyatni oshirish yoʻnalishlarida amaliy hamkorlikni yanada kengaytirishdan manfaatdor ekanliklarini tasdiqladilar.

Taʼlim, inson resurslarini rivojlantirish, sogʻliqni saqlash, madaniyat, sport va turizm

38. Rahbarlar hindistonlik talabalarning Oʻzbekiston va Hindiston xalqlari oʻrtasidagi koʻp asrlik doʻstlik aloqalarini mustahkamlashga qoʻshayotgan salmoqli hissasini eʼtirof etdilar.

39. Rahbarlar Oʻzbekistonda hindshunoslik yoʻnalishining izchil rivojlanib borayotganini mamnuniyat bilan qayd etdilar hamda Hindistonda oʻzbekshunoslikni rivojlantirishni qoʻllab-quvvatladilar.

40. Rahbarlar inson resurslarini rivojlantirish sohasidagi hamkorlikni mustahkamlash muhimligini taʼkidladilar. Mazkur yoʻnalish Oʻzbekiston va Hindiston oʻrtasidagi muhim bogʻlovchi koʻprik boʻlib xizmat qilishi, jumladan, qoʻshma ilmiy-tadqiqot dasturlari va akademik hamkorlik tashabbuslarini amalga oshirish orqali taʼminlanishi qayd etildi.

41. Rahbarlar salohiyatni oshirish va inson resurslarini rivojlantirish sohalarida, xususan, tibbiyot, farmatsevtika, kimyo, nanotexnologiya va biotexnologiya yoʻnalishlaridagi koʻp yillik va oʻzaro manfaatli sheriklikni yuqori baholadilar. Oʻtgan yillar davomida Oʻzbekistonning 2 700 nafardan ortiq fuqarosi Hindistonning Texnik va iqtisodiy hamkorlik dasturida (ITEC) ishtirok etdi, 400 nafardan ortiq oʻzbekistonlik talaba, jumladan, AYUSh doirasidagi stipendiyalar hisobidan, Hindiston Madaniyat aloqalari kengashi (ICCR) stipendiyalariga sazovor boʻldi. Shu munosabat bilan Oʻzbekiston tomoni Hindistonning Oʻzbekistonda hind tili boʻyicha Lal Bahodur Shastri stipendiyasi joriy etilishi toʻgʻrisidagi eʼlonini olqishladi. Rahbarlar ITEC dasturi doirasida inson resurslarini rivojlantirish sohasidagi hamkorlikni yanada ragʻbatlantirishga tayyor ekanliklarini tasdiqladilar.

42. Oʻzbekiston va Hindiston kelajak avlodlar uchun yanada yashil va sogʻlom sayyorani qoldirishga intilishni birgalikda baham koʻradilar. Bu intilish Oʻzbekistonning “Yashil makon” va Hindistonning “Ek Ped Maa Ke Naam” tashabbuslarida oʻz ifodasini topgan. Ushbu mushtarak maqsadlar asosida Oʻzbekiston va Hindiston Orolboʻyi mintaqasini koʻkalamzorlashtirish va ekologik reabilitatsiya qilish sohasida hamkorlik qiladilar. Mazkur reabilitatsiya ishlari, shu jumladan zarur texnik koʻmak koʻrsatilishi, Hindistonning grant yordami doirasida 1 million AQSH dollari miqdorida amalga oshiriladi.

43. Rahbarlar ilmiy tadqiqotlarning ilgʻor usullaridan foydalanish va bir-birining ustunliklarini samarali ishga solish orqali yangi davolash usullari va terapiyalarni ishlab chiqishni nazarda tutgan holda, biomeditsina tadqiqotlari va tibbiy innovatsiyalar kabi yoʻnalishlarni qamrab olgan holda jamoat salomatligini muhofaza qilish tizimlarini mustahkamlash sohasida hamkorlikni kengaytirishga kelishib oldilar.

44. Rahbarlar farmatsevtika sohasidagi tobora rivojlanib borayotgan hamkorlikni yuqori baholab, “Tashkent Pharma Park” innovatsion ilmiy-sanoat farmatsevtika klasterining qoʻshma loyihalarni amalga oshirish, zamonaviy farmatsevtika ishlab chiqarishga investitsiyalar jalb etish, ishlab chiqarishni mahalliylashtirish, texnologiyalar transferini taʼminlash hamda yuqori malakali kadrlarni tayyorlash uchun samarali platforma sifatidagi katta salohiyatini taʼkidladilar. Rahbarlar ikki mamlakatning tegishli muassasalari va farmatsevtika kompaniyalari oʻrtasidagi hamkorlikni yanada chuqurlashtirishga sodiqliklarini tasdiqladilar.

45. Rahbarlar Hindiston kompaniyalari bilan hamkorlikda Oʻzbekistonda yangi tibbiy markazlar va laboratoriyalar, shuningdek, ilmiy-tadqiqot muassasalari va qoʻshma farmatsevtika ishlab chiqarish korxonalarini tashkil etishni qoʻllab-quvvatladilar.

46. Oʻzbekiston va Hindiston xalqlari oʻrtasidagi asrlar davomida shakllangan tarixiy aloqalar, mushtarak madaniy va sivilizatsion meros hamda oʻzaro hurmat anʼanalarini eʼtirof etgan holda, Rahbarlar madaniyat va gumanitar hamkorlikni yanada kengaytirishga, jumladan, madaniyat kunlari, festivallar, koʻrgazmalar, ijodiy jamoalar gastrollarini tashkil etish hamda ikki mamlakat madaniy muassasalari oʻrtasidagi bevosita aloqalarni mustahkamlashga sodiqliklarini tasdiqladilar. Ikki Rahbar 2026–2030-yillarga moʻljallangan Madaniy almashinuvlar dasturi, imzolanganini, shuningdek, Arxivlar sohasidagi Oʻzbekiston–Hindiston hamkorligini mamnuniyat bilan olqishladilar.

47. Rahbarlar jahon madaniy merosi obyektlarini asrab-avaylash, oʻrganish, restavratsiya qilish va targʻib etish sohasidagi hamkorlik muhimligini taʼkidladilar hamda tegishli ilmiy-tadqiqot muassasalari, muzeylar va restavratsiya markazlari oʻrtasida, jumladan, madaniy meros obyektlarini raqamlashtirish, arxeologik artefaktlarning uch oʻlchamli (3D) modellarini yaratish va ularni muhofaza qilishda ilgʻor texnologiyalardan foydalanish orqali hamkorlikni kengaytirishga qiziqish bildirdilar. Shu munosabat bilan, Rahbarlar Fayoztepa va Qoratepa hududida buddaviy yodgorliklarni konservatsiya va restavratsiya qilish boʻyicha imzolangan Ahdlashuv bayonini yuqori baholadilar.

48. Rahbarlar sport sohasidagi hamkorlikni, shu jumladan, badminton, kamondan oʻq otish va shaxmat kabi sport turlarida sportchilarni tayyorlash va murabbiylar malakasini oshirish boʻyicha tajriba almashish orqali kuchaytirishga kelishib oldilar.

49. Rahbarlar sogʻlom turmush tarzini targʻib etish va xalqlar oʻrtasidagi aloqalarni mustahkamlashda yoganing muhim rolini mamnuniyat bilan qayd etib, 21-iyun – Xalqaro yoga kunining ahamiyatini taʼkidladilar. Ular Oʻzbekiston Yoga federatsiyasi va Hindistonning AYUSh vazirligi oʻrtasida instruktorlar tayyorlash, Oʻzbekistonning xalqaro Yogasana musobaqalarida ishtiroki olqishladilar. Rahbarlar Hindistonning yetakchi mutaxassislari ishtirokida Oʻzbekistonda yogani ommalashtirish va rivojlantirishni qoʻllab-quvvatlashni davom ettirishga tayyor ekanliklarini tasdiqladilar. Rahbarlar, shuningdek, anʼanaviy tibbiyot sohasidagi hamkorlik toʻgʻrisida Anglashuv memorandumining tuzilganini olqishladilar.

Xalqaro hamkorlik

50. Rahbarlar BMT global tinchlik va xavfsizlikni saqlashda markaziy oʻrin tutishi lozimligini yana bir bor tasdiqladilar. Ular Birlashgan Millatlar Tashkiloti hamda boshqa xalqaro va mintaqaviy tashkilotlarda oʻzaro qoʻllab-quvvatlashni nazarda tutgan holda hamkorlikni mustahkamlashga kelishib oldilar.

51. Rahbarlar BMT, shu jumladan, Xavfsizlik Kengashini zamonaviy dunyo voqeliklarini aks ettirish, xalqaro tinchlik va xavfsizlik masalalarini hal etishda uni yanada vakillik xususiyatiga ega, samarali va taʼsirchan institutga aylantirish maqsadida har tomonlama isloh qilishga chaqirdilar. Oʻzbekiston Hindistonning BMT Xavfsizlik Kengashiga doimiy aʼzo boʻlish uchun nomzodini qoʻllab-quvvatlashini yana bir bor tasdiqladi.

52. Rahbarlar Global Janubning umumiy manfaatlarini ilgari surish maqsadida xalqaro maydonlarda muvofiqlashuvni yanada mustahkamlashga sodiqliklarini tasdiqladilar.

53. Rahbarlar Shanxay hamkorlik tashkiloti (SHHT) doirasidagi hamkorlikni yanada mustahkamlashga sodiqliklarini tasdiqlab, uni oʻzaro ishonchni mustahkamlash, mintaqaviy tinchlik, xavfsizlik va barqarorlikni ragʻbatlantirish, shuningdek, savdo-iqtisodiy munosabatlar, investitsiyalar hamda madaniy-gumanitar almashinuvlar sohalaridagi hamkorlikni kengaytirishning muhim platformasi sifatida eʼtirof etdilar.

54. Oʻzbekiston Respublikasi Prezidenti Shavkat Mirziyoyev Hindiston Respublikasining 2026-yildagi BRICS tashkilotiga raisligi bilan Hindiston Bosh vaziri Narendra Modini tabriklab, BRICS sammitini muvaffaqiyatli tashkil etishda muvaffaqiyatlar tiladi.

55. Hindiston Respublikasi Bosh vaziri Narendra Modi Oʻzbekistonning 2027–2030-yillarda Qoʻshilmaslik harakatiga raisligi muvaffaqiyatli boʻlishiga ishonch bildirdi va Harakat asoschi aʼzosi sifatida uni qoʻllab-quvvatlashni davom ettirishga tayyorligini tasdiqladi.

56. Har ikki Rahbar Xalqaro katta mushuklar alyansi va Xalqaro quyosh alyansini tegishli sohalarda global hamkorlikni ilgari surish platformalari sifatidagi muhim rolini qayd etdilar. Hindiston tomoni Oʻzbekistonning mazkur tuzilmalarga qoʻshilishga boʻlgan qiziqishini olqishladi hamda uning aʼzo boʻlishi uchun zarur maslahatlashuvlar va jarayonlarni faol ilgari surishga tayyorligini bildirdi.

57. Hindiston Respublikasi Bosh vaziri Narendra Modi Oʻzbekiston Respublikasi Prezidenti Shavkat Mirziyoyevga, shuningdek, Oʻzbekiston Respublikasi Hukumati va xalqimizga tashrif davomida koʻrsatilgan samimiy qabul va yuksak mehmondoʻstlik uchun samimiy minnatdorlik izhor etdi.

58. Hindiston Respublikasi Bosh vaziri Oʻzbekiston Respublikasi Prezidentini Hindistonga javob tashrifi bilan kelishga taklif qildi. Tashrif sanasi diplomatik kanallar orqali kelishib olinadi.

Toshkent shahri,

2026-yil 30-avgust