O‘zbekiston delegatsiyasi Sankt-Peterburgda mehnat migratsiyasi va fuqarolar huquqlarini himoya qilish masalalari bo‘yicha muzokaralar o‘tkazdi
2026-06-12 14:40:00 / Yangiliklar va voqealar
2026-yil 11-iyun kuni O‘zbekiston Respublikasi tashqi ishlar vaziri o‘rinbosari Olimjon Abdullayevning Sankt-Peterburg shahriga amaliy tashrifi doirasida Sankt-Peterburg va Leningrad viloyati hukumatlari rahbariyati, Tashqi aloqalar qo‘mitasi, Mehnat va aholini bandlik qo‘mitasi hamda boshqa qator ixtisoslashgan tashkilotlar vakillari bilan muzokaralar bo‘lib o‘tdi.
Uchrashuvlar davomida Rossiya tomoni O‘zbekiston delegatsiyasining 29-Peterburg xalqaro iqtisodiy forumidagi ishtirokini yuqori baholab, mamlakat rahbariyati tashrifining O‘zbekiston–Rossiya ittifoqchilik munosabatlarini yanada mustahkamlashdagi ahamiyatini alohida ta’kidladi.
Tomonlar savdo-iqtisodiy, investisiyaviy va hududlararo hamkorlikni kengaytirishdan o‘zaro manfaatdor ekanliklarini tasdiqladilar. Surxondaryo viloyatida joylashgan “Ayritom” xalqaro savdo markazining qo‘shma investisiya va logistika loyihalarini amalga oshirish uchun istiqbolli maydon sifatidagi yuqori salohiyati qayd etildi. Shuningdek, Rossiya tomoni bo‘lajak Toshkent xalqaro investisiya forumida ishtirok etishga qiziqish bildirdi.
Tashrifning muhim natijalaridan biri sifatida Xalqaro mehnat migratsiyasiga ko‘maklashish assosiatsiyasi bilan Samarqand viloyatida rus tili, Rossiya tarixi va qonunchiligi bo‘yicha test sinovlarini o‘tkazish markazini ochish haqida kelishuvga erishildi.
“Бронка Групп” ва “Южный” migratsiya markazlari rahbariyati O‘zbekiston bilan tashkillashtirilgan mehnat migratsiyasi, kadrlar tayyorlash hamda fuqarolarga xizmat ko‘rsatish shart-sharoitlarini takomillashtirish sohalarida hamkorlikni kengaytirishga qiziqish bildirdi. Muzokaralar yakunlari bo‘yicha markazlarning o‘tkazuvchanlik qobiliyatini oshirish, ko‘rsatilayotgan xizmatlar sifatini yaxshilash hamda Sankt-Peterburg shahridagi O‘zbekiston Bosh konsulxonasi bilan hamkorlikda vatandoshlarga axborot ko‘magini kuchaytirish bo‘yicha kelishuvlarga erishildi.
O‘zbekiston fuqarolarining huquq va qonuniy manfaatlarini himoya qilish masalalariga alohida e’tibor qaratildi. Sankt-Peterburg va Leningrad viloyati inson huquqlari hamda bola huquqlari bo‘yicha vakillari, shuningdek Xalqaro advokatlar kollegiyasi rahbariyati bilan uchrashuvlar yakunlari bo‘yicha huquqiy yordam ko‘rsatish sohasidagi hamkorlikni kengaytirish va tezkor hamkorlik mexanizmlarini takomillashtirishga oid kelishuvlarga erishildi.
Tashrif doirasida delegatsiya Leningrad viloyati Xorijiy fuqarolarni vaqtincha saqlash markazida ham bo‘lib, u yerda saqlanayotgan O‘zbekiston fuqarolari uchun yaratilgan sharoitlar bilan tanishdi. Muassasa rahbariyati bilan zarur hujjatlarni rasmiylashtirish jarayonlarini jadallashtirish va fuqarolarning Vatanga tezroq qaytarilishini ta’minlash bo‘yicha chora-tadbirlar kelishib olindi.
O‘zbekiston fuqarolarining huquqlarini himoya qilish va ularga konsullik ko‘magini ko‘rsatish masalalari Sankt-Peterburg shahridagi O‘zbekiston Respublikasi Bosh konsulxonasi tomonidan doimiy nazoratda saqlanmoqda.