Indoneziya elchisi bilan uchrashuv to‘g‘risida
2026-06-09 20:45:00 / Yangiliklar va voqealar
2026-yil 9-iyun kuni O‘zbekiston Respublikasi tashqi ishlar vaziri o‘rinbosari Mirvohid Azimov Indoneziya Respublikasining mamlakatimizdagi Favqulodda va Muxtor Elchisi Siti Ruhaini Juhayatin bilan uchrashuv o‘tkazdi.
Muloqot davomida O‘zbekiston–Indoneziya ko‘p qirrali hamkorligining hozirgi holati va istiqbolli yo‘nalishlarini muhokama qilindi. Bo‘lajak tadbirlarni tayyorlash masalalariga alohida e’tibor qaratildi. Ularning kun tartibini aniq loyihalar va hujjatlar bilan boyitish, ikki tomonlama munosabatlarni sifat jihatidan yangi bosqichga olib chiqish muhimligi ta’kidlandi.
Tomonlar o‘zaro savdo hajmini oshirish, eksport va import tarkibini diversifikatsiya qilish hamda mavjud to‘siqlarni bartaraf etish bo‘yicha aniq chora-tadbirlarni belgilab oldi. Kimyo, farmatsevtika va qishloq xo‘jaligi sohalariga Indoneziya kapitalini jalb etish imkoniyatlari ko‘rib chiqildi.
Hamkorlikning eng jadal rivojlanayotgan yo‘nalishlaridan biri sifatida turizm, xususan “ziyorat turizmi” alohida qayd etildi.
Uchrashuv yakunida Toshkent va Jakarta o‘rtasidagi hamkorlikni ikki tomonlama kun tartibining barcha yo‘nalishlari bo‘yicha yanada chuqurlashtirishga qat’iy intilish tasdiqlandi.