O‘zbekiston-Hindiston siyosiy maslahatlashuvlari bo‘lib o‘tdi
2026-05-13 20:00:00 / Yangiliklar va voqealar
2026-yil 13-may kuni Dehli shahrida O‘zbekiston Respublikasi va Hindiston Respublikasi tashqi ishlar vazirliklari o‘rtasidagi siyosiy maslahatlashuvlarning 17-davrasi bo‘lib o‘tdi.
Muzokaralarda O‘zbekiston delegatsiyasiga tashqi ishlar vazirining birinchi o‘rinbosari Bahromjon A’loyev, Hindiston tomoniga esa tashqi ishlar vaziri o‘rinbosari Sibi Jorj boshchilik qildi.
Do‘stona va konstruktiv ruhda o‘tgan uchrashuv davomida ikki mamlakat o‘rtasidagi strategik sheriklik munosabatlarining bugungi holati atroflicha tahlil qilindi. Siyosiy, savdo-iqtisodiy, investitsiyaviy va madaniy-gumanitar sohalardagi hamkorlikni yanada chuqurlashtirish istiqbollari muhokama markazida bo‘ldi.
Tomonlar turli yo‘nalishlardagi aloqalar ko‘lami izchil kengayib borayotganini mamnuniyat bilan qayd etdi. Ayniqsa, axborot texnologiyalari, farmatsevtika, tibbiyot, ta’lim, turizm va fuqarolik aviatsiyasi tarmoqlarida yuqori natijalarga erishilayotganiga to‘xtalib o‘tildi. Hududlararo aloqalarni yanada rivojlantirish uchun mavjud qulay imkoniyatlar haqida so‘z yuritildi.
Muloqot davomida xalqaro maydondagi hamkorlik masalalariga ham e’tibor qaratildi. Xususan, ko‘p tomonlama tuzilmalar va xalqaro platformalar doirasidagi aloqalarni yangi mazmun bilan boyitish, mintaqaviy xavfsizlikni ta’minlash borasidagi sa’y-harakatlarni muvofiqlashtirish bo‘yicha fikr almashildi.
Tomonlar o‘zaro manfaatli investitsiyaviy loyihalarni qo‘llab-quvvatlash va iqtisodiy sheriklikni kengaytirishdan birdek manfaatdor ekanini tasdiqladi.