Noqonuniy baliq ovlash natijasida tabiatga qariyb 700 million so‘m zarar yetkazildi
2025-09-19 15:30:00 / Yangiliklar
Sirdaryo daryosining Guliston tumani "Terakzor" MFY hududidan oqib o‘tuvchi qismida o‘tkazilgan reyd davomida fuqarolar I.D., B.Y. va I.D, tomonidan noqonuniy ov quroli, ya'ni elektr qarmoq hamda rezina qayiq yordamida turli xildagi 36 ta baliq, jumladan, 1 dona O‘zbekiston Qizil kitobiga kiritilgan "Turkiston mo‘ylovdori" ovlangani ma'lum bo‘ldi.
Huquqbuzarlik natijasida "Ov qilish va ovchilik xo‘jaligi to‘g‘risida", "Hayvonot dunyosini muhofaza qilish va undan foydalanish to‘g‘risida" hamda "Tabiatni muhofaza qilish to‘g‘risida"gi qonunlar buzilgan. Natijada hayvonot dunyosiga 694 million 220 ming so‘m zarar yetkazilgan.
Reyd davomida tegishli tartibda dalolatnoma rasmiylashtirilib, noqonuniy ovlangan 36 dona baliq, 1 dona elektr qarmoq, 1 dona rezina qayiq, 2 dona akkumulyator, 1 juft eshkak, 1 dona tutgich va 1 dona tungi yoritish moslamasi holatga huquqiy baho berilgunga qadar vaqtincha saqlash uchun olib qo‘yildi.
Ish yuzasidan hujjatlar holatga huquqiy baho berish va chora ko‘rish maqsadida Sirdaryo viloyat prokuraturasiga yuborildi.
Ma'lumot uchun, avvalroq Sirdaryo daryosi hududida noqonuniy tarzda baliq ovlayotganlar to‘xtatib qolingandi. Reyd tadbirlari davom etmoqda.