Samarqandda elektr uzatish havo tarmoqlarini qurish loyihasi yuzasidan jamoatchilik eshituvlari o‘tkazildi
2025-11-05 10:00:00 / Yangiliklar
Eshituvlarda loyihada texnik-iqtisodiy asoslash, muhandislik va ekologik baholash ishlari xalqaro talablarga muvofiq olib borilayotganligi, “Yuchi Energy Consulting” MCHJ tomonidan loyiha bo‘yicha muhandislik va ekologik tahlil ishlari amalga oshirilayotganligi, shuningdek, mehnat xavfsizligi, atrof-muhitni asrash va jamoat manfaatlarini himoya qilish ustuvor yo‘nalishlardan biri ekanligi ta’kidlandi.
Bundan tashqari, qurilish jarayonida atmosferaga chiqariladigan zararli tashlamalarni kamaytirish, qazish ishlari natijasida flora va faunaga salbiy taʼsir ko‘rsatmaslik hamda barcha jarayonlarni ekologik monitoring tizimi orqali nazorat qilish lozimligi qayd etildi.
Ma’lumot uchun, ushbu loyiha “O‘zbekiston milliy elektr tarmoqlari” va Osiyo taraqqiyot banki (OTB) hamkorligida boshlandi. Loyiha uchun Loyihani baholash hujjati (LBH) ishlab chiqilmoqda va Samarqand viloyatidagi “So‘g‘diyona” nim stansiyasidan Qashqadaryo viloyatidagi “Tallimarjon” nim stansiyasigacha bo‘lgan 224 km masofada 500 kVlik elektr uzatish havo tarmoqlari qurilishi rejalashtirilgan.
Loyihadan asosiy maqsad — mamlakatning energetika tizimidagi ishonchlilikni taʼminlash, elektr taʼminotidagi uzilishlarni kamaytirish va mintaqalarni barqaror energiya bilan taʼminlashdir. Loyiha amalga oshgach Samarqand, Urgut, Pastdarg‘om va Nurobod tumanlarida elektr taʼminoti barqarorlashishi, elektr energiyasi tizimida yuklama mutanosib taqsimlanishi, mahalliy ishlab chiqarish va aholi uchun energiya taʼminotida sifat va barqarorlik oshishi ko‘zda tutilgan.