10 kunda belgilanmagan joyga chiqindi tashlash bilan bog‘liq qancha holat aniqlandi?
2025-10-27 16:00:00 / Yangiliklar
Ayni damda Respublikada Prezident topshirig‘iga ko‘ra tozalik va ozodalik oyligi davom etmoqda. Oylik doirasida Ekologiya, atrof-muhitni muhofaza qilish va iqlim o‘zgarishi vazirligi, Bosh prokuratura, Milliy gvardiya va Ichki ishlar vazirligi xodimlaridan iborat ishchi guruh tuzilib, atrof-muhitni ifloslantirish bilan bog‘liq huquqbuzarliklar o‘rganilmoqda va tegishli choralar ko‘rilmoqda.
Xususan, 15-oktabrdan 25-oktabrga qadar belgilanmagan joylarga chiqindi tashlash bilan bog‘liq 3792 ta holat aniqlandi va huquqbuzarlarga qonuniy chora ko‘rildi. Hozirda kuchaytirilgan reyd tadbirlari davom etmoqda.
Shuningdek, tozalik va ozodalik oyligi doirasida barcha hududlarda obodonlashtirish ishlari amalga oshirilmoqda, mahallalar, ko‘chalar, ta'lim muassalari va boshqa obyektlar chiqindilardan tozalanmoqda.
Ekologiya vazirligi barchani oylik doirasidagi tozalik tadbirlarida faol ishtirok etishga, duch kelgan joyga chiqindi tashlamaslikka, atrof-muhit tozaligiga nisbatan mas'uliyatli bo‘lishga chaqiradi. Unutmang, tabiatni ifloslantirganlik uchun qat'iy javobgarlik mavjud.