O‘zbekiston Respublikasi Ekologiya va iqlim o‘zgarishi milliy qo‘mitasi

CITES Hujjatlarida qayd etilgan noyob qush – Qoshiqburun

Qoshiqburun – uchib o‘tuvchi-uyalovchi qush bo‘lib, xalqaro miqyosda himoya ostiga olingan hamda CITES Konvensiyasining II Ilovasiga va Bonn Konvensiyasining II Ilovasiga kiritilgan.

Janubiy Orolbo‘yi, Sirdaryo, Amudaryo, Surxondaryo, Zarafshon havzalari va Farg‘ona vodiysidagi tekislik suv havzalarida uyalaydi va uchib o‘tadi. Uning yashash joylari Qozog‘iston, Sibir, Yevropa, Shimoliy Afrika va Xitoygacha cho‘zilgan.

1960-yillarda Janubiy Orolbo‘yida tez-tez uchragan bu tur hozirda ko‘plab joylarda yo‘q bo‘lib ketgan. Hozirgi kunda Amudaryo quyi oqimida 200 ga yaqin, Farg‘ona vodiysi va Aydar-Arnasoy ko‘llarida 50 tadan atrofida qushlar uyalaydi.

Qoshiqburun bahorda aprel-mayda uchib o‘tib, qamishzorlarda boshqa qushlar bilan koloniya bo‘lib uyalaydi. U mayda baliqlar, qurbaqalar va suv umurtqasizlari bilan oziqlanadi.

Uning soni kamayishiga asosiy sabab – Orol dengizi havzasi suv rejimining o‘zgarishi oqibatida yashash joylarining yemirilishidir.

Qoshiqburunni ovlash qat’iyan taqiqlangan. U Arnasoy, Qoraqir va Dengizko‘l buyurtmaxonalarida muhofaza ostiga olingan. Bundan tashqari, turning populyatsiyasini oshirish maqsadida Yevropa va Osiyoning ko‘plab hayvonot bog‘larida ko‘paytiriladi.