Sirdaryo viloyati Guliston tumani “Bahmal” MFY hududida olib borilgan reyd davomida fuqarolar A.T. va M.D. “Sho‘razak” zovuridan noqonuniy ov quroli, ya’ni “elektr qarmoq”dan foydalangan holda turli xildagi jami 37 dona baliqni (20 dona “Kumush tovon” balig‘i, 3 dona “Мoy baliq” va 14 dona “Ilonbosh”  balig‘i) noqonuniy ravishda ovlab, rezina qayiqda suv havzasidan olib chiqib ketmoqchi bo‘lishganida to‘xtatib qolindi. 

Holat yuzasidan tegishli tartibda dalolatnoma rasmiylashtirilib, noqonuniy ravishda ovlangan baliqlar va noqonuniy ov quroli
bo‘lgan 1 dona elektr qarmoq, 1 dona rezina qayiq, 1 dona akkumulyator, 1 juft eshkak, 1 dona tutgich va 1 dona tungi yoritish moslamasi holatga huquqiy baho berilgunga qadar vaqtinchalik saqlash uchun olib qo‘yildi.

Mazkur holat sodir etilishi natijasida O‘zbekiston Respublikasi “Ov qilish va ovchilik xo‘jaligi to‘g‘risida”gi qonunning 3, 27-moddalari, “Hayvonot dunyosini muhofaza qilish va undan foydalanish to‘g‘risida”gi qonunning 34, 35-moddalari, “Tabiatni muhofaza qilish to‘g‘risida”gi qonunning 49-moddasi talablari buzilgan. Hayvonot dunyosiga bazaviy hisoblash miqdorining 865 baravari miqdorida zarar yetkazilgan. 

Huquqbuzarlik yuzasidan to‘plangan hujjatlar holatga huquqiy baho berish va tegishli chora ko‘rish maqsadida Sirdaryo viloyati prokuraturasiga yuborildi.