Tabiatga 31 mlrd so‘mdan ortiq zarar yetkazilgani ma’lum bo‘ldi
2025-10-15 15:00:00 / Yangiliklar
Tekshirish davomida korxona bugungi kungacha “Ekologik oqibatlar bayonoti” loyihasini ishlab chiqmasdan va davlat ekologik ekspertizasi ijobiy xulosasini olmasdan faoliyat yuritayotganligi aniqlandi. Qolaversa, korxonaga ajratilgan kon chegarasi tashqarisidagi belgilangan bo‘lmagan maydondan tuproq foydali qazilmasi noqonuniy qazib olinganligi va natijada tabiatga 31 milliard 921 million 145 ming 350 so‘m zarar yetkazilganligi ma’lum bo‘ldi.
Bundan tashqari, korxona hududini hamda unga tutash hududlarni “Yashil makon” va “Yashil belbog‘” dasturlari doirasida obodonlashtirish va ko‘kalamzorlashtirish ishlarini olib borish, zavod atrofida kengbargli daraxt turlarini ekish orqali changni ushlab qolish va hududning kamida 25 foiz qismini ko‘kalamzorlashtirish talablarini belgilangan. Biroq korxona tomonidan bu talablar bajarilmagan.
Shu bilan birga, tekshirish davomida korxona tomonidan 2024-yil hamda 2025-yilning dastlabki 8 oyi davomida belgilangan joylarga chiqindilar tashlanmagani, aksincha, atrof-muhit ifloslantirib kelinganligi aniqlandi. Natijada Vazirlar Mahkamasining “O‘zbekiston Respublikasi hududida atrof tabiiy muhitni muhofaza qilishning iqtisodiy mexanizmlarini yanada takomillashtirish to‘g‘risida”gi qaroriga asosan, 7 milliard 769 million 802 ming 711 so‘m miqdorida kompensatsiya to‘lovi hisoblandi.
Yuqoridagi holatlar natijasida “Tabiatni muhofaza qilish to‘g‘risida”gi qonunning 48-moddasi, “Yer qa’ri to‘g‘risidagi” qonunning 18-moddasi, “Chiqindilar to‘g‘risida”gi qonunning 15-moddasi hamda “Ekologik ekspertiza to‘g‘risida”gi qonunning 11- va 13-moddalari talablari buzilgan.
Aniqlangan holat yuzasidan to‘plangan hujjatlar huquqiy baho berish hamda tegishli chora ko‘rish maqsadida Bosh prokuraturaga yuborildi.