O‘zbekiston Respublikasi Ekologiya va iqlim o‘zgarishi milliy qo‘mitasi

Tekshiruvda aniqlanishicha, 2024-yil 25-noyabrda O‘zbekiston Respublikasi Tog‘-kon sanoati va geologiya vazirligi “Yer qa'ridan foydalanish markazi” DMning 2024-yil 23-oktabrdagi 44-sonli qaroriga asosan Samarqand viloyati Bulung‘ur tumani markazidan 7,7 km shimoliy-g‘arbda joylashgan 11,3 gektar maydondagi  lyossimon jinsdan iborat bo‘lgan “Jomboy 3” uchastkasida geologik qidiruv ishlarini o‘tkazish uchun elektron onlayn auksion o‘tkazilgan. Аuksionda “S. I.” xorijiy korxonasi g‘olib deb topilib, 2024-yil 27-noyabrda Tog‘-kon sanoati va geologiya vazirligi tomonidan geologik qidiruv ishlarini o‘tkazish uchun ruxsatnoma berilgan.
 
Biroq korxona qazib olish uchun tegishli tartibdagi ruxsatnomani rasmiylashtirmagan hamda geologik o‘rganish maqsadida berilgan ruxsatnoma hamda auksion shartlarida ko‘rsatilgan talablarga rioya qilmagan holda noruda qazilmalarni noqonuniy qazish ishlarini amalga oshirgan. O‘lchov ishlari amalga oshirilganda xorijiy korxona tomonidan 50 859,25 m3 tuproq (lyossimon jinslar) noqonuniy qazib olinganligi aniqlandi.

Mazkur holat natijasida O‘zbekiston Respublikasi “Tabiatni muhofaza qilish to‘g‘risida”gi qonunning 18-48-moddalari hamda “Yer qa’ri to‘g‘risida”gi qonunning 34-moddasi talablari buzilgan. Shuningdek, O‘zbekiston Respublikasi Vazirlar Mahkamasining 2022-yil 23-noyabrdagi 666-son qaroriga asosan tabiatga 7 milliard 374 million 591 ming 250 so‘m zarar yetkazilganligi hisoblandi. 

To‘plangan hujjatlar holatga huquqiy baho berish va tegishli chora ko‘rish maqsadida Bosh prokuraturaga yuborildi.