Shavkat Mirziyoyev Gabaladagi sammitda muhim tashabbuslarni ilgari surdi
2025-10-07 17:30:00 / Yangiliklar
Gabaladagi sammit TDTning mustaqil mintaqaviy kuch markazi sifatidagi roli kuchayib borayotganligini ko’rsatdi. Shavkat Mirziyoyev sammitida turk dunyosining birdamligini mustahkamlash, jahon siyosati, iqtisodiyoti va gumanitar sohadagi rolini oshirishga qaratilgan qator muhim tashabbuslarni ilgari surdi.
Jumladan, Prezident tomonidan Samarqandda TDT tashqi ishlar vazirlari va maxsus xizmatlari rahbarlarining birinchi qo‘shma uchrashuvini o‘tkazish, TDTning 2030-yilga qadar rivojlantirish strategiyasini ishlab chiqish, yoshlarning ekologik savodxonligini oshirish, Turkiy davlatlarning iqtisodiy sheriklik bo‘yicha Doimiy kengashini tuzish va uning Loyiha ofisini Toshkentda joylashtirish, Turkiy davlatlarning Sanoat alyansi, "Turkiy yashil yo‘laklar" tizimi va "Yashil transformatsiya" konsorsiumini tashkil etish, turk organik mahsulotlarning yagona brendini jahon bozoriga olib chiqish va boshqa muhim takliflar bildirildi.
Shuningdek, Shavkat Mirziyoyev
sun'iy intellekt va kreativ iqtisodiyot bo‘yicha “yo‘l xaritasi"ni qabul qilish va Turkiy dunyo xalqaro ko‘rgazmasini O‘zbekistonda o‘tkazish, 2026-yilda "Nizomiy Ganjaviy va Alisher Navoiy ijodi – Turkiy dunyo ma'naviy hayotida" mavzusida xalqaro konferensiya tashkil qilish kabi takliflarni ham bildirdi. Shu bilan birga, O‘zbekistonda qo‘shma tadqiqotlar va innovatsiyalar maydoniga aylantiriladigan Turkiy davlatlar xalqaro universiteti tashkil etilishi e'lon qilindi.
Ta’kidlash joizki, Oʻzbekiston TDTga a'zo davlatlar hamkorligini – mintaqada barqarorlik va oʻzaro ishonchni mustahkamlovchi qoʻshma loyihalar, investitsiyalar, infratuzilma va bilim almashishda ifodalanishi kerak, degan qat'iy ishonchdan kelib chiqib harakat qilmoqda.
TDT maydonida Oʻzbekiston transport va logistika boʻyicha oʻzaro bogʻliqlikni mustahkamlash, xususan, Markaziy Osiyo, Kavkaz va Yevropani bogʻlaydigan Oʻrta (Transkaspiy) transport yoʻlagini rivojlantirish gʻoyalarini ham izchil ilgari surmoqda. Ushbu yoʻnalish TDTning rasmiy hujjatlarida iqtisodiy integratsiyaning ustuvor yoʻnalishlaridan biri sifatida tilga olinmoqda.
Davlatimiz rahbari tomonidan sammitda bildirilgan fikrlar TDTga a’zo davlatlar hamkorligini kuchaytirishga va O‘zbekistonning bu boradagi rolini yanada mustahkamlashga xizmat qiladi.