Noqonuniy baliq ovi: zarar 100 million so’mdan ortiq
2025-10-07 15:50:00 / Yangiliklar
Buxoro viloyati Ekologiya, atrof-muhitni muhofaza qilish va iqlim o‘zgarishi boshqarmasi tezkor nazorat guruhi tomonidan G‘ijduvon tumanida joylashgan Sho‘rko‘l suv omborida ekologik nazorat reyd tadbiri o‘tkazildi.
Reyd davomida G‘ijduvon tumanida yashovchi ikki nafar fuqaro tomonidan elektr toki yordamida noqonuniy baliq ovlash holati aniqlangan. Ular tomonidan 17 dona zog‘ora va O‘zbekiston Respublikasi Qizil kitobiga kiritilgan 1 dona Turkiston mo‘ylovdori ovlangan.
Huquqbuzarlik natijasida tabiatga 107 million 532 ming so‘m zarar yetkazilgan.
Holat yuzasidan 18 dona baliq hamda 1 dona rezina qayiq ashyoviy dalil tariqasida olib qo‘yildi. Tegishli organlarga birlamchi hujjatlar yuborilib, hozirda tergov-surishtiruv harakatlari olib borilmoqda.
Ma’lumot uchun, avvalroq Sirdaryo daryosi hududida ham noqonuniy baliq ovlangani va hayvonot dunyosiga 679 million 400 ming so‘m zarar yetkazilgani aniqlangan edi.Reyd tadbirlari davom ettirilmoqda.