Gender tenglik borasida xabardorlikni oshirish masalalari muhokama qilindi
2025-10-02 11:00:00 / Yangiliklar
Unda Bosh vazir o‘rinbosari, Oila va xotin-qizlar qo‘mitasi raisi Zulayho Mahkamova, turli vazirlik va idoralar vakillari, xususan, Ekologiya, atrof-muhitni muhofaza qilish va iqlim o‘zgarishi vazirligining mas’ul mutaxassisi ham ishtirok etdi.
Yig‘ilishda maslahat kengashlari faoliyatini takomillashtirish, turli soha va yo‘nalishlarda amalga oshirilayotgan ishlar hamda islohotlarni keng jamoatchilik va xalqaro hamjamiyatga yetkazish masalalari muhokama qilindi. Shuningdek, Ekologiya vazirligi tizimidagi xotin-qizlar va erkaklar uchun qilinayotgan ishlar haqida ma’lumot berildi va yangi takliflar bildirildi.
Ta’kidlash joizki, O‘zbekistonda xotin-qizlarning huquq va qonuniy manfaatlarini himoya qilish, ularni ijtimoiy-siyosiy, iqtisodiy va madaniy hayotga faol jalb etish borasida keng ko‘lamli islohotlar amalga oshirilmoqda. Bu yo‘nalishda “O‘zbekiston modeli” shakllantirilib, hayotga tatbiq etilmoqda. Xususan, “O‘zbekiston – 2030” strategiyasi, qolaversa, 2030-yilga qadar gender tenglikka erishish strategiyasi va barcha jabhalarda xotin-qizlarning faolligini oshirishga qaratilgan Milliy dastur xotin-qizlarning ta’lim olish va ish bilan ta’minlash imkoniyatlarini kengaytirishga xizmat qilmoqda.
O‘z navbatida davlat organlari va tashkilotlari hamkorligida xotin-qizlar va erkaklar uchun teng huquq hamda imkoniyatlarni ta‘minlash masalalari bo‘yicha maslahat kengashlarini tashkil etish borasida keng ko‘lamli ishlar amalga oshirildi. Natijada bugungi kunda vazirlik va idoralar, tashkilot, korxona hamda muassasalarda 4000 dan ortiq maslahat kengashlari tashkil etildi. Xususan, Ekologiya vazirligi, vazirlikning tizim tashkilotlari va hududiy bo‘linmalarida ham maslahat kengashlari faoliyat olib bormoqda.
Ma’lumot uchun, BMTning “Ayollar — BMT” tuzilmasining yurtimizdagi vakolatxonasi tomonidan “O‘zbekistonning gender tenglik bo‘yicha mamlakat profili” loyihasining dastlabki muhokamasi o‘tkazildi. Unda xotin-qizlarning ekologiya, atrof-muhit va iqlim o‘zgarishdagi ishtiroki haqida alohida to‘xtalib o‘tilgan.