Maqsad Oʻzbekiston Respublikasi Prezidentining “Respublikada yashillik darajasini yanada oshirish, “Yashil makon” umummilliy loyihasini izchil amalga oshirish orqali ekologik barqarorlikni taʼminlash chora-tadbirlari toʻgʻrisida” 2023-yil 23-noyabrdagi 199-son Farmoni ijrosini taʼminlash, “Yashil makon” umummilliy loyihasini samarali davom ettirish hamda aholi o‘rtasida daraxt ekish milliy qadriyatini yanada ommalashtirishdir. 

Chempionat 2024-yildan boshlab 5-apreldan 5-maygacha hamda 25-oktabrdan 5-dekabrgacha tashkil etiladi. Unda mamlakatimiz kelajagiga befarq boʻlmagan, tashkiliy-huquqiy va mulkchilik shaklidan hamda idoraviy mansubligidan qatʼi nazar, talabalar, oʻquvchilar, davlat va nodavlat-notijorat tashkilotlari vakillari hamda 18 yoshdan 70 yoshgacha boʻlgan barcha fuqarolar ishtirok etishlari mumkin.

Nominatsiyalar:

— “Yashil makon” umummilliy loyihasi doirasida eng koʻp daraxt koʻchatlarini ekkan tabiat himoyachisi”;
— “Yashil makon” umummilliy loyihasi doirasida eng koʻp daraxt koʻchatlarini ekkan eng yosh tabiat himoyachisi”;
— “Choʻl hududlarida eng koʻp daraxt koʻchatlarini ekkan tabiat himoyachisi”;
— “Yoʻl yoqalarida eng koʻp daraxt koʻchatlarini ekkan tabiat himoyachisi”;
— “Mahallada eng koʻp daraxt koʻchatlarini ekkan tabiat himoyachisi”. 

Talablar:  

1.  Amalga oshirilgan ishlar haqidagi maʼlumotlar hisobot shaklida foto va videomateriallarni ilova qilgan holda yuborishlari lozim. Daraxtlarning soni alohida ko‘rsatilishi kerak. 
2. Bajarilgan ishlar haqidagi foto va videomateriallar ijtimoiy tarmoqlarga (instagram, facebook, twitter, youtube va telegram) joylashtirilishi kerak.
3. Maʼlumotlar foto va video formatdagi ilovalar hamda ushbu maʼlumotlar joylashtirilgan ijtimoiy tarmoqlar havolalari bilan birgalikda taqdim qilinadi.
4. Maʼlumotlar va bajarilgan ishlar boʻyicha ommaviy axborot vositalarida joylashtirilgan foto va videomateriallar havolalari PDF formatda, foto va videomateriallar RAR fayl formatda bo‘lishi kerak.

Topshirilgan ishlar quyidagi mezonlar bo‘yicha baholanadi:

— ekilgan daraxtlar soni;
— daraxt ekish joylari va koʻchat turlari to‘g‘ri tanlanganligi;
— ekilgan koʻchatlar sugʻorish tizimi bilan taʼminlanganligi;
— koʻchatlarni kelgusida parvarishlash uchun egaligiga biriktirilganligi;
— ekilgan koʻchatlar “Yashil makon” elektron platformasiga kiritilganligi;
— ijtimoiy tarmoqlarda yoritilishi.

G‘oliblar har bir nominatsiya bo‘yicha aniqlanib, 5-iyun – Butunjahon atrof-muhit kuni hamda 20-dekabrda daraxt koʻchatlarini ekish mavsumi tugaganidan soʻng taqdirlanadi.

Eko-chempionatda qatnashish uchun vazirlikning rasmiy  Eko-chempionat@eco.gov.uz elektron manziliga yoki https://forms.gle/tcfDgPcoG5yo5sAm8 havolasi orqali ariza  yuboring. Qoʻshimcha maʼlumot uchun vazirlikning +998(71) 207-07-70 (ichki: 1108#) raqamiga murojaat qiling!