O‘zbekiston Respublikasi Ekologiya va iqlim o‘zgarishi milliy qo‘mitasi

Forumda Markaziy Osiyo davlat idoralari, biznes, ilmiy jamoatchilik, nodavlat notijorat tashkilotlari vakillari ishtirok etdi. Asosiy maqsad sanoat ekologiyasi va barqaror rivojlanishning asosiy masalalarini muhokama qilish uchun mintaqaviy platforma yaratish bo‘ldi. Eng yaxshi mavjud texnologiyalarni joriy etish, ekologik jarayonlarni raqamlashtirish, chiqindilarni boshqarish tizimini rivojlantirish, shaffoflikni taʼminlash va fuqarolik jamiyati ishtirokida nodavlat notijorat tashkilotlarining rolini kuchaytirishga alohida eʼtibor qaratildi.

Tadbirda so‘zga chiqqan Ekologiya vaziri maslahatchisi Alisher Salomov O‘zbekistonda Prezident Shavkat Mirziyoyev boshchiligida "yashil" iqtisodiyotni rivojlantirish, tabiiy resurslardan oqilona foydalanish borasida keng ko‘lamli islohotlar amalga oshirilayotganini alohida ta’kidladi.

“2025-yil O‘zbekistonda “Atrof-muhitni asrash va "yashil" iqtisodiyot yili” deb e’lon qilinib, tabiatni asrash kun tartibining ustuvorligi ta’kidlandi. Atrof-muhitni muhofaza qilish, chiqindilarni boshqarish, "yashil" energiyani rivojlantirish va ESG standartlarini joriy etishni o'z ichiga olgan davlat dasturi tasdiqlandi.

Maqsadimiz 2030-yilgacha chiqindilarni qayta ishlash ulushini 60 foizga, "yashil" energiya ulushini esa 54 foizga yetkazishdir”, — dedi A.Salomov.

Shuningdek, Chiqindilarni boshqarish va sirkulyar iqtisodiyotni rivojlantirish agentligini tashkil etish, 23 milliondan ortiq aholini qamrab oluvchi “Toza makon” elektron hisob-kitob tizimini joriy etish, xalqaro investorlar ko‘magida chiqindilardan energiya ishlab chiqaruvchi zamonaviy korxonalar qurish loyihalari muhokama qilindi.

O‘zbekistonning 2025-yil mart oyida "Orxus" konvensiyasiga qo‘shilishi, ommaviy tadbirlar va aksiyalar o‘tkazish orqali aholi o‘rtasida ekologik madaniyatni faol rivojlantirishga alohida e’tibor qaratildi.

Nihoyat, Alisher Salomov forum ishtirokchilarini Global ekologik fondning 8-assambleyasi doirasida Samarqand shahrida boʻlib oʻtadigan “Eco Expo Central Asia 2026” xalqaro koʻrgazmasiga taklif qildi.

Forum dasturidan ekologik toza texnologiyalarni joriy etuvchi hududiy korxonalarga tashrif bilan sanoat safari, shuningdek, innovatsion yashil yechimlar ko‘rgazmasi o‘rin olgan. “Ekologiya va ishlab chiqarish: barqaror kelajak sari yo‘l” mavzusidagi yalpi majlisda iqtisodiy o‘sish va ekologik xavfsizlik o‘rtasidagi muvozanat, ekologik tashabbuslarni amalga oshirishda yirik kompaniyalarning roli, global va milliy maqsadlarga erishish masalalari muhokama qilindi.

Pavlodardagi forum sanoat ekologiyasi bo‘yicha tajriba almashish va qo‘shma yechimlarni ishlab chiqish uchun muhim mintaqaviy platformaga aylandi. O‘zbekistonning ishtiroki uning "yashil" transformatsiyalar, aylanma iqtisodiyotni rivojlantirish, atrof-muhitni muhofaza qilish bo‘yicha xalqaro hamkorlik masalalaridagi faol pozitsiyasini mustahkamladi.