O‘zbekiston Respublikasi Ekologiya va iqlim o‘zgarishi milliy qo‘mitasi

Ma’lumot uchun, O‘zbekiston Respublikasi Prezidentining 2019-yil 30-oktabrdagi 5863-son Farmoniga muvofiq, 2022-yil 1-yanvardan boshlab zaharlilik darajasi “Yevro-4” ekologik toifa talablariga mos kelmaydigan gaz, benzin va dizel dvigatellari bilan jihozlangan “M” va “N” toifalardagi g‘ildirakli transport vositalaridan foydalanish va ularni sotish maqsadida “vaqtincha olib kirish” va “erkin muomala (import) uchun chiqarish” bojxona rejimiga joylashtirish man etilgan.

Ushbu talablar bugungi kunga qadar Vazirlar Mahkamasining 2020-yil 30-yanvardagi 50-son qarori bilan tasdiqlangan “O‘zbekiston Respublikasiga olib kiriladigan “M” va “N” toifalardagi g‘ildirakli yangi transport vositalarining ekologik toifa talablariga muvofiqligini ekologik sertifikatlash tartibi to‘g‘risidagi nizom”ga muvofiq ekologik sertifikatlash tizimi orqali tartibga solingan edi.

“Xizmatlar sohasi barqaror rivojlanishi uchun qulay shart-sharoitlar yaratishga oid qo‘shimcha chora-tadbirlar to‘g‘risida” 2025-yil 27-fevraldagi PQ–78-son qarorga ko‘ra esa O‘zbekistonga olib kiriladigan “M” va “N” toifalardagi yangi g‘ildirakli transport vositalarining ekologik toifa talablariga muvofiqligini ekologik sertifikatlash bo‘yicha davlat xizmatlari va funksiyalari xususiy sektorga o‘tkazilishi belgilandi.

Shu munosabat bilan Vazirlar Mahkamasining 2025-yil 19-sentabrdagi “Respublikada g‘ildirakli transport vositalarining ekologik toifa talablariga muvofiqligini baholash tizimini yanada takomillashtirish chora-tadbirlari to‘g‘risida”gi 597-son qarori qabul qilindi. Unga muvofiq O‘zbekistonga olib kiriladigan M va N toifalardagi g‘ildirakli yangi transport vositalarining ekologik toifa talablariga muvofiqligi Hukumatning 2017-yil 25-apreldagi 237-son qarori bilan tasdiqlangan muomalaga chiqarilayotgan g‘ildirakli transport vositalarining xavfsizligi to‘g‘risidagi umumiy texnik reglament talablari asosida baholanadi.

Bunda transport vositalarining “Yevro-4” ekologik toifa talablariga muvofiqligini baholash ishlari transport vositalarining muvofiqligini baholash tizimining ajralmas qismi bo‘lib, tegishli akkreditatsiyadan o‘tgan muvofiqlikni baholash organlari tomonidan amalga oshiriladi. Bu orqali O‘zbekistonga olib kiriladigan “M” va “N” toifalardagi g‘ildirakli transport vositalarini sertifikatlash jarayonlari yengillashtirildi.