O‘zbekiston Respublikasi Ekologiya va iqlim o‘zgarishi milliy qo‘mitasi

Ekologiya, atrof-muhitni muhofaza qilish va iqlim o‘zgarishi vazirligi hamda uning huzuridagi Chiqindilarni boshqarish va sirkulyar iqtisodiyotni rivojlantirish agentligi tomonidan “Coca-cola” va “Yandex Uzbekistan” kompaniyalari hamda “O‘zsanoatqurilishbank” hamkorligida o‘tkazilgan xalqaro aksiya davomida hududlar jami 55,7 tonna chiqindidan tozalandi. 

Ma’lumot uchun, “World Cleanup Day” 2018-yildan beri o‘tkaziladi. Unda shu paytga qadar 211 davlatdan 114 mln kishi ishtirok etgan. Har yili dunyo bo‘ylab keng nishonlanadigan ushbu eko-sanada O‘zbekistonda ham soha xodimlari, eko-faollar, yoshlar, jamoatchilik vakillari ishtirokida plogging aksiyalari o‘tkazib kelinmoqda. Bu eko-tabdirlar orqali aholi gavjum hududlarni chiqindilardan tozalash ana’naga aylangan.

Aksiya davomida vazirlik va agentlik mutasaddilari, sektorlar mas’ullari, Toshkent viloyati va shahri boshqarmalari hamda tizim tashkilotlar vakillari, yoshlar, eko-faollar, ommaviy axborot vositalari vakillari Toshkent dengizi sohilidagi belgilangan hududni chiqindilardan tozalashdi. 

Tadbirning ochilish marosimida “Asosiy maqsadimiz keng jamoatchilikning chiqindilarga bo‘lgan munosabatini o‘zgartirish va bu orqali chiqindilar hosil bo‘lishini kamaytirishdir. Aslida, faqat “Butunjahon tozalik kuni”da emas, har kuni atrof-muhitni toza saqlashimiz lozim”, — dedi Ekologiya vazirligi bo’lim boshlig’i Zarrina Abdullayeva.

Chiqindilarni boshqarish agentligi direktori Sharifbek Hasanov esa chiqindilar sektori iqlim oʻzgarishi, bioxilma-xillikning nobud boʻlishi hamda atrof-muhitning ifloslanishiga sabab boʻlayotganligini qayd etdi. 

“Statistik maʼlumotlarga koʻra, mamlakatimizda bir kunda 19-20 ming tonna chiqindi hosil boʻlmoqda. Chiqindilar turli xil metallar, shisha idishlar, qog‘oz, plastik va oziq-ovqat mahsulotlarining qoldiqlaridan iborat. Birgina 2024-yilda respublikada yig‘ilgan jami 14 mln tonna chiqindilarning faqat 5,2 foizi qayta ishlangan”, — deya ta’kidladi u.

Shuningdek, Sharifbek Hasanov BMTning “World cleanup day” global tarmog‘iga ulanib, O‘zbekiston xalqaro eko-aksiyada doimiy ishtirok etib kelayotganini va bu yil ham aksiya keng ko‘lamda tashkil qilingani haqida ma'lumot berdi.  

Plogging davomida Toshkent dengizi sohili bo‘yida 962 kg chiqindi yig‘ildi. 200 kg plastik idish qayta ishlash uchun yuborildi. Yakunda O‘rmon xo‘jaligi agentligi jamoasi 1-o‘rinni (223 kg chiqindi), “Yosh ekologlar jamoasi” 2-o‘rinni (175 kg chiqindi) va Toshkent viloyati “Toza hudud” korxonasi jamoasi 3-o‘rinni (155 kg chiqindi) egalladi.

Bundan tashqari, yosh eko-faol rassomlar tomonidan atrof-muhitni ozoda saqlashga doir suratlar chizildi. Tadbir yakunida g‘olib va sovrindor jamoalar, faol ishitirokchilar hamda hamkor tashkilotlar munosib taqdirlandi.

Ma'lumot uchun, O‘zbekistonda  o‘tgan yili "World cleanup day" xalqaro eko-aksiyasi doirasida hududlar jami 36,5 tonna chiqindidan tozalangan.

Bu kabi tadbirlar har birimizda tabiatga daxldorlik hissini uyg‘otib, ekologik barqarorlikni taʼminlash hamda isteʼmol va ishlab chiqarishning oqilona modellariga o‘tish orqali chiqindini aylanma iqtisodiyotning muhim bo‘lagiga aylantirishga xizmat qiladi.