IV xalqaro haykaltaroshlik simpoziumi uchun eng yaxshi loyihalar saralab olindi
2025-09-12 10:00:00 / Yangiliklar
Simpozium tashkilotchilari — O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, O‘zbekiston Badiiy akademiyasi va Badiiy ijodkorlar uyushmasi.
Bu yilgi Simpozium Samarqand shahrida o‘tkaziladigan Birlashgan Millatlar Tashkilotining Yo‘q bo‘lib ketish xavfi ostidagi yovvoyi fauna va flora turlarining xalqaro savdosi to‘g‘risidagi konvensiyasi (CITES) Tomonlar konferensiyasining 20-yig‘ilishi (COP-20)ga bag‘ishlanadi. Tadbir dunyoning turli burchaklaridan san’at ustalarini birlashtiradi hamda o‘zaro tajriba almashish, madaniy hamkorlik, tabiatni asrash g‘oyalarini ilgari surish uchun muhim maydonga aylanadi.
Simpozium tanloviga 53 mamlakatdan 175 nafar haykaltarosh 300 dan ortiq loyihalarini taqdim etdi. Professional hakamlar hay’ati qaroriga ko‘ra, Samarqand shahrida 16 loyihani, jumladan, 14 nafar xorijlik va 4 nafar o‘zbekistonlik haykaltaroshlar ishlarini amalga oshirishga ruxsat berildi. Ishtirokchilar geografiyasiga Yaqin Sharq, Yevropa va Osiyo mamlakatlari: O‘mon, Eron, Turkiya, Hindiston, Buyuk Britaniya, Gruziya, Xitoy, Yaponiya va O‘zbekiston kiradi.
Simpoziumning bosh mavzusi — “Bizning sayyoramiz – bizning uyimiz”. Asosiy e’tibor dolzarb ekologik masalalar, tabiatni muhofaza qilish va barqaror kelajakni shakllantirishda insonning roliga qaratiladi. Tanlovda asarlarning yuqori professional darajasi, belgilangan mavzuga muvofiqligi hamda ularni keng shahar auditoriyasiga mo‘ljallangan “Public Art” formatida ko‘rgazmaga qo‘yish imkoniyati hisobga olindi.
Tanlangan loyihalar nafaqat badiiy qiymatga ega, shu bilan birga san’at va ijtimoiy ahamiyatga molik g‘oyani uyg‘unlashtirgan holda ona sayyoramizni asrab-avaylash zarurati haqida muhim chaqiriq bo‘lib xizmat qiladi.