Oq boshli qumoy tabiat bag‘riga qaytarildi
2025-09-10 16:00:00 / Yangiliklar
Samarqand viloyati Ekologiya, atrof-muhitni muhofaza qilish va iqlim o‘zgarishi boshqarmasi mutaxassislari va Omonqo‘ton milliy tabiat bog‘i xodimlari tomonidan oq boshli qumoy qushi tabiat bag‘riga qo‘yib yuborildi.
Ma’lumot uchun, bu qush avvalroq Toyloq tumanidagi aholi yashash xonadonlaridan biri atrofiga ochlik va holsizlik tufayli ucholmay kelib qolgan hamda Zarafshon milliy tabiat bog‘i reabilitatsiya markaziga maxsus tibbiy ko‘rikdan o‘tkazish maqsadida qabul qilingandi.
Oq boshli qumoy zaif, qisqarib borayotgan, o‘troq, mozaik tarqalgan nominal kenja tur sifatida O‘zbekiston Qizil kitobi, Tabiatni muhofaza qilish xalqaro ittifoqi Qizil ro‘yxati hamda CITESning II Ilovasiga kiritilgan. Tog‘ etaklari va o‘rta (dengiz sathidan 700-2500 metr) qismlarida uyalaydi, tog‘ va tekisliklarda, jumladan, haydaladigan yerlarga ko‘chib yuradi. Tuyoqlilar o‘laksasi bilan oziqlanadi.