Toshkentda havo tozaligini ta’minlash chora-tadbirlari muhokama qilindi
2025-09-06 17:00:00 / Yangiliklar
Tadbir O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, “Zamin” xalqaro jamoat fondi, Finlyandiyaning Markaziy Osiyodagi elchixonasi, Yaponiyaning O‘zbekiston Respublikasidagi elchixonasi, Birlashgan Millatlar Tashkilotining Atrof-muhit bo‘yicha dasturi (UNEP) va Taraqqiyot Dasturi (BMTTD) tomonidan tashkil etildi.
Muloqotda davlat organlari, xalqaro tashkilotlar, ekspertlar hamjamiyati va fuqarolik jamiyati vakillari ishtirok etdi. Ishtirokchilar havo sifatini yaxshilash, shaharlar barqarorligini mustahkamlash va ilmiy ma’lumotlarga asoslangan shaharsozlikni rivojlantirish bo‘yicha amaliy yechimlarni muhokama qildilar.
“Toza havo tashabbusi bugungi kunda nafaqat O‘zbekiston, balki butun mintaqa uchun dolzarb masala. Shuning uchun yurtimizda bu borada ko’plab ishlar amalga oshirilmoqda. Xususan, Ekologiya vazirligi tashabbusi bilan “Avtomobilsiz kun”, “Toza havo” oyligi kabi aksiyalar bo’lib o’tmoqda. Qolaversa, vazirlik va vazirlikning hududiy boshqarmalari tomonidan atmosferaga zararli tashlamalar chiqaradigan manbalarni aniqlash va bartaraf etish maqsadida doimiy reyd tadbirlari o‘tkazilmoqda”, — dedi Ekologiya vaziri maslahatchisi Alisher Salomov.
“Zamin” xalqaro jamoat fondi direktori Aziz G‘aniyev esa keyingi yillarda O‘zbekistonda havoni kuzatishning yagona elektron avtomatlashtirilgan tizimi yaratilgani, xalqaro standartlar joriy etilgani, jahon tarmog‘iga integratsiyalashgan 23 avtomatlashtirilgan stansiya o‘rnatilganini alohida ta’kidladi.
"Bu muhim yutuq, ammo ekotizim ifloslantiruvchi moddalar bosimi ostida qolmoqda. Shuning uchun ham bu formatdagi birgalikdagi sa'y-harakatlar va muloqotlar katta ahamiyatga ega", — dedi u.
Finlyandiya meteorologiya institutining Energetika va havo sifati bo‘limi boshlig‘i Katya Lyoven Finlyandiya va O‘zbekiston o‘n yildan buyon toza havo sohasida hamkorlik qilib kelayotganini qayd etdi.
“Bugungi kunda biz birgalikda havo ifloslanishidan erta ogohlantirish loyihalari ustida ishlayapmiz, shuningdek, Termiz va Namangan shaharlarida havo sifatini oʻrganish ishlarini olib bormoqdamiz. Bu ilmiy maʼlumotlar bizga tashlamalarni kamaytirish va havo tozaligiga erishish boʻyicha samarali chora-tadbirlar ishlab chiqish imkonini beradi”, — dedi u.
Tadbir BMTTDning Yaponiya hukumati ko‘magida amalga oshirilayotgan “Markaziy Osiyo shaharlarining tabiiy ofatlar xavfi va iqlim o‘zgarishiga chidamliligini kuchaytirish” mintaqaviy loyihasi doirasida o‘tkazildi.