Tungi xotirjamlik: Xongul fotoqopqonda
2025-09-03 12:00:00 / Yangiliklar
Xongul yo‘q bo‘lib ketayotgan, lokal tarqalgan kenja tur sifatida O‘zbekiston Qizil kitobi va CITESning II Ilovasiga kiritilgan. Shuningdek, transchegaraviy ko‘chib yuruvchi tur sifatida Bonn Konvensiyasidan joy olgan. Turni saqlab qolish bo‘yicha davlatlararo miqyosda dastur va Reja tasdiqlangan.
Xongullar o‘tmishda Sirdaryo va Amudaryo havzalarining barcha to‘qayzorlarida keng tarqalgan. Hozirda Amudaryo vodiysining yuqori (Surxondaryo viloyati) va o‘rta (Buxoro viloyati Qizilqum qo‘riqxonasi) oqimida yashovchi, Zarafshon milliy tabiat bog‘i va Quyi Amudaryo biosfera rezervati, shuningdek, Zarafshon daryosi yuqorisida – O‘zbekiston va Tojikiston chegarasidagi aborigen populyatsiyalari, introduksiya va reintrouduksiya yo‘li bilan yuzaga kelgan sun’iy guruhlari mavjud.
Bu hayvonlar qayir to‘qayzorlari, ba’zan ularga yondosh qumli cho‘llarda yashaydi. Yozda tunlari, qishda esa kunduzi ham faol. Sentabr–oktabrda juftlashadi, may-iyunda bolalaydi, bolalari 2–3 yoshida voyaga yetadi. Daraxt, buta, o‘tsimon o‘simliklar bilan oziqlanadi.
Ma'lumot uchun, Qizilqum davlat qo'riqxonasi 1971-yil 23-iyunda Buxoro viloyatida tashkil etilgan. Hududda 350 turdan ortiq hayvonot dunyosi vakillari yashaydi, shundan 50 turi O'zbekiston Qizil kitobiga kiritilgan.