30-mart kuni “Chiqindisiz dunyo uchun!” ommaviy plogging eko-aksiyasi bo‘lib o‘tadi. Tadbir "World Zero-Waste day" munosabati bilan Ekologiya, atrof-muhitni muhofaza qilish va iqlim o‘zgarishi vazirligi hamda uning huzuridagi Sanitar tozalash ishlarini tashkil etish respublika markazi tomonidan tashkil etilmoqda. 

Aksiya Qoraqalpog‘iston Respublikasi, Toshkent shahri hamda barcha viloyatlarda soat 10:00da start oladi. Tadbir davomida hududlar chiqindilardan tozalanadi.

Ekoaksiya respublikamiz bo‘ylab quyidagi manzillarda tashkil etiladi:

— Toshkent viloyati — Toshkent dengizi sohili bo‘yida;
— Toshkent shahri — Yakkasaroy tumani, Sharshara ko‘chasida;
— Sirdaryo viloyati — Guliston shahri, “Yangi Hayot” MFY, Buyuk kelajak ko‘chasida;
— Jizzax viloyati — Sharof Rashidov tumani, “Toqchilik” MFY va Uchtepa dahasini bog‘lovchi katta yo‘l yoqasida;
— Samarqand viloyati — Samarqand shahri, “Hishrav” qo‘rg‘onida;
— Navoiy viloyati — Navoiy shahri, “Kimyogar” MFY, Amir Temur ko‘chasida;
— Buxoro viloyati — Buxoro shahri, “Somoniylar” istirohat bog‘ining eski qal’a devori bilan tutash hududida;
— Surxondaryo viloyati — Boysun tumanida;
— Xorazm viloyati — Urganch shahri, “Amir Temur” istirohat bog‘ida;
— Qashqadaryo viloyati — viloyat markazidagi “Alisher Navoiy” nomidagi istirohat bog‘i hududida;  
— Andijon viloyati — Andijon tumani, “Yangi Andijon” massivida;
— Namangan viloyati — To‘raqo‘rg‘on tumani, “Baxt” MFY hududidan o‘tuvchi avtomobil yo‘lida;
— Farg‘ona viloyati — Farg‘ona shahri, “Satkak” dam olish ziyoratgohida;
— Qoraqalpog‘iston Respublikasi — Nukus shahri, “Do‘stlik kanali” bo‘yi dam olish maskanida.

Hurmatli yurtdoshlar! Barchangizni xalqaro chiqindisiz dunyo uchun ekoaksiyasida faol ishtirok etishga hamda yurtimiz ozodaligiga hissa qo‘shishga chaqiramiz!