Toshkentda O‘zbekistonning "NDC Partnership"dagi birinchi missiyasi doirasida Hamkorlar muvofiqlashtiruvchi uchrashuvi bo‘lib o‘tdi
2025-08-29 14:00:00 / Yangiliklar
Tadbirda O‘zbekiston Respublikasining asosiy vazirlik va idoralari, xalqaro tashkilotlar hamda rivojlanish bo‘yicha hamkorlar ishtirok etib, milliy iqlim maqsadlari va ularni qo‘llab-quvvatlash choralarini muhokama qilishdi.
"NDC Partnership" — bu mamlakatlarga o‘zlarining milliy iqlim majburiyatlarini bajarishda yordam beruvchi global tashabbus bo‘lib, moliyaviy va texnik yordamni samarali taqdim etishga qaratilgan. 2025-yilda O‘zbekiston "NDC Partnership"ga a’zo bo‘lib, milliy darajadagi hissani amalga oshirish uchun ko‘makni jalb qilish va koordinatsiyani yaxshilash maqsadini ko‘zlagan.
Muvofiqlashtiruvchi uchrashuv O‘zbekistonning Parij kelishuvi doirasidagi xalqaro majburiyatlarini bajarish doirasida o‘tkazildi.
“Global iqlim chaqiriqlari sharoitida milliy va xalqaro hamkorlar hamda barcha manfaatdor tomonlar o‘rtasidagi yaqin hamkorlik va muvofiqlashtirish umumiy iqlimiy maqsadlarimizga erishishda nihoyatda muhimdir”, – dedi Ekologiya vaziri o‘rinbosari Jusipbek Kazbekov.
Tadbir davomida NDC Partnership vakillari hamkorlik faoliyati haqida ma’lumot berishdi. Ular quyidagi koordinatsiya mexanizmlari bilan tanishtirishdi: davlatlar so‘roviga binoan belgilangan milliy hissalarni amalga oshirish va takomillashtirish bo‘yicha yordam, ilg‘or tajriba, saboqlar va muhim resurslar almashinuvi orqali iqlimiy harakatlarni kengaytirish, rivojlanayotgan davlatlarga iqlimiy moliyalashtirishni jalb qilish va mavjud manbalarni samarali yo‘naltirishda yordam ko‘rsatish.
Ishtirokchilar O‘zbekistonning yangilangan Milliy hissa (NDV 3.0) va uglerod neytralligiga erishish bo‘yicha Uzoq muddatli strategiyani ishlab chiqish va amalga oshirishdagi ustuvor yo‘nalishlari hamda ehtiyojlarini muhokama qilishdi. Kelgusi iqlimiy siyosat rejalari bo‘yicha rivojlanish borasida hamkorlar tomonidan ko‘rsatilayotgan amaldagi yordam alohida qayd etildi.
“NDV 3.0 doirasidagi majburiyatlar iqlimiy harakatlarni adolatli o‘tish konsepsiyasi bilan uyg‘unlashtiradi – bu dekarbonizatsiya va iqlim o‘zgarishiga moslashishga yo‘naltirilgan, adolat, ijtimoiy inklyuziya va munosib ish o‘rinlari yaratish tamoyillariga asoslangan jarayondir. Ushbu yondashuv doirasida ishchilar va zaif guruhlar «yashil» iqtisodiyotdan foyda ko‘radi va kam uglerodli rivojlanishga o‘tish bilan bog‘liq salbiy oqibatlardan himoyalanadi”, – dedi BMTTDning O‘zbekistondagi doimiy vakili Akiko Fujii.
Mazkur tadbir hukumat idoralari va rivojlanish bo‘yicha hamkorlar o‘rtasidagi muvofiqlashtirishni kuchaytirishga, shuningdek, iqlim siyosatida ijobiy darajani saqlab qolishga qaratilgan keyingi qadamlarni belgilashga xizmat qiladi.