CITES CoP20 ga 100 kun: O‘zbekiston rasmiy konferensiya shiorini e’lon qildi
2025-08-21 17:00:00 / Yangiliklar
Bu shior ikki xil ramziylikni – Konvensiyaning 50 yilligini hamda Samarqandning sivilizatsiyalar, madaniyatlar va tabiatni muhofaza qilish borasidagi sa’y-harakatlar chorrahasi sifatidagi beqiyos rolini aks ettiradi.
“CITES CoP20” 2025-yil 24-noyabrdan 5-dekabrgacha Samarqand shahrida fan, huquq, atrof-muhitni muhofaza qilish va xalqaro savdo bo‘yicha minglab mutaxassislarni, shuningdek, butun dunyodan hukumatlar, hukumatlararo va nodavlat tashkilotlar, xususiy sektor va yoshlar tarmoqlari vakillarini birlashtiradi.
O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov tanlangan shior zamirida chuqur ma’no borligini ta’kidladi:
"Bu faqat shior emas. U bizning kelajakdagi qarashlarimizni ifodalaydi, ya'ni tabiatni asrashga insonlardan alohida emas, balki ular bilan birgalikdagi umumiy yo‘l sifatida qaralishi kerak. Samarqand Sharq va G‘arbni asrlar davomida bog‘lab kelgan qadimiy an’anasi bilan, CITESning 50 yillik yo‘lini tahlil qilish va uning kelajakdagi rejalarini shakllantirish uchun eng mos joy bo‘ladi."
CITES Bosh kotibi Ivonn Igero esa quyidagilarni ta'kidladi:
"Biz CITES orqali xalqaro hamkorlikda yarim asrlik faoliyatni nishonlayotganimizda, ushbu shior CITESning ruhi va uning rolini to’liq ifodalaydi: CITES 184 ta mamlakat va Yevropa Ittifoqini birlashtirgan holda, insonlar va yovvoyi tabiat o‘rtasida o‘zaro uyg‘unlikni ta’minlaydi, fan va siyosatni birlashtiradi hamda hayvonlar va o‘simlik turlarini kelajak avlodlar uchun saqlab qoladi".
O‘zbekiston “CITES CoP20” mezboni sifatida global bioxilma-xillik kun tartibiga o‘z hissasini qo‘shish majburiyatini yana bir bor tasdiqladi. Ilgari taqdim etilgan konferensiya logotipi Samarqand me’moriy merosi bilan tabiiy timsollar – arxar (tog‘ qo‘ylari) va rodiola semyonova (rhodiola semenovii) dorivor o‘simligi uyg‘unlashgani uchun e’tirofga sazovor bo‘ldi.
Samarqand shahrida o‘tkaziladigan “CITES CoP20” O‘zbekistonning atrof-muhitni muhofaza qilish sohasidagi xalqaro mavqeini oshiradi, ilmiy va institutsional hamkorlikni mustahkamlaydi hamda butun dunyo e’tiborini Markaziy Osiyoning noyob flora va faunasiga qaratadi.