Aydar-Arnasoy ko‘llar tizimida qoidabuzarliklar uchun 80 million so‘mdan ortiq jarimalar qo‘llanildi
2025-08-14 18:00:00 / Yangiliklar
Ekologiya, atrof-muhitni muhofaza qilish va iqlim o‘zgarishi vazirligining Aydar-Arnasoy ko‘llar tizimi ustidan nazorat bo‘limi xodimlari joriy yil 1–3-avgust kunlari ekologik nazorat bo‘yicha navbatdagi tadbirlarni o‘tkazdi.
Reydlar davomida 13 ta huquqbuzarlik aniqlandi. O‘zbekiston Respublikasi Ma’muriy javobgarlik to‘g‘risidagi kodeksining tegishli moddalari asosida huquqbuzarlarga jami 82 million 400 ming so‘m miqdorida jarima qo‘llanildi.
Ma’lumot uchun: Aydar-Arnasoy ko‘llar tizimi mamlakatimizdagi eng yirik suv-botqoq hududlardan biri bo‘lib, o‘nlab turdagi baliqlar, qushlar va boshqa hayvonot dunyosi vakillarining yashash joyi hisoblanadi. Bu yerda ekologik muvozanatning buzilishi mintaqaning biologik xilma-xilligiga jiddiy salbiy ta’sir ko‘rsatishi mumkin.
Navbatdagi nazorat tadbirlari ham noqonuniy baliq ovlash va boshqa turdagi brakonerlikning oldini olishga qaratildi.
Aydar-Arnasoy ko‘llarini muhofaza qilish ishlari davom ettiriladi.