Barqaror isteʼmol tamoyillari bilan hamohang: Xivada Qovun sayli boʻlib oʻtdi
2025-08-11 10:00:00 / Yangiliklar
Tadbir turizm, qishloq xo‘jaligi brendlari va madaniy merosni birlashtirib, mehmonlarni Xorazm qovunlarining noyob navlari, milliy taomlari va xalq hunarmandchiligi bilan tanishtirmoqda.
Tashkilotchilar — Ekologiya, atrof-muhitni muhofaza qilish va iqlim o‘zgarishlari vazirligi, Turizm qo‘mitasi va Xorazm viloyati hokimligi hamkorligida qovunlarning xushbo‘y hidi teatrlashtirilgan tomoshalar, folklor dasturlari va mahorat saboqlari bilan uyg‘unlashgan muhit yaratildi.
Tarix va innovatsiyalarni o‘zida mujassam etgan zamonaviy sayyohlik markazi — yangi "Arda Xiva" majmuasi taqdimotiga alohida e’tibor qaratildi. Gastronomik zonalar, hunarmandlar ko'chasi va madaniy tadbirlar uchun maydonlar mavjud.
Bu yil hunarmandlar yarmarkasida ekologik toza mahsulotlarga alohida e’tibor qaratildi: tabiiy materiallardan qayta ishlatiladigan sumka va aksessuarlar, loy va yog‘och idishlar, qayta ishlangan matolar va ikkilamchi resurslardan tayyorlangan bezak buyumlari. Shu bilan birga, Xiva shahar pavilyoni alohida ajralib turdi — unda nafaqat mahsulotlar dizayni va taqdimotiga ijodiy yondashilgani, balki ekologik toza materiallardan maksimal darajada foydalanilgan holda tayyorlanilgani ham namoyon bo‘ldi. Bu an'anaviy hunarmandchilik barqaror iste'molning zamonaviy tamoyillari bilan uyg'unligi misollaridan biriga aylandi.
Festival doirasida 22 ta tematik stendda viloyatlar va fermer xo‘jaliklari tomonidan qovunning eng yaxshi navlari, yetishtirish texnologiyalari va oshpazlik kashfiyotlarini namoyish etilmoqda. Gastronomik zonalarda “shivit osh”, “gumma”, qovunli shirinliklarni tatib ko‘rish, o‘ymakorlik san’atini tomosha qilish mumkin.
Mehmonlar uchun O‘zbekiston, Turkiya, Rossiya, Belgiya, Qozog‘iston va Ozarbayjon san’atkorlari ishtirokidagi konsertlar, xalq o‘yinlari, milliy sport turlari, rang-barang fotozonalar tashkil etildi.
2024-yilda festivalga 400 mingdan ortiq mehmon tashrif buyurgan bo‘lsa, bu yil millionga yaqin, jumladan, 150-200 ming xorijiy sayyoh keldi.
Tadbir nafaqat hosil bayrami, balki Xorazm viloyatini ekologik jihatdan mas’uliyatli va sayyohlik jozibador hudud sifatida tanitish maydonchasidir.