Ekologiya, atrof-muhitni muhofaza qilish va iqlim o‘zgarishi vazirligi tomonidan Dasturda belgilangan vazifalarni bajarish, ekologik vaziyatni yaxshilash borasida joriy yarim yillikda bir qancha samarali ishlar amalga oshirildi. Xususan, ekologiya va atrof-muhitni muhofaza qilishga qaratilgan 18 ta normativ-huquqiy hujjat loyihalari ishlab chiqilib, Vazirlar Mahkamasiga kiritildi. 

Qolaversa, bahorgi koʻchat ekish mavsumida “Yashil makon” umummilliy loyihasi doirasida 137 mln tup koʻchat ekildi, 13,8 mln dona, jumladan, 1 024 ta og‘ir toifadagi mahallalarga 808 ming dona, maktab va ta’lim muassasalariga 411 ming dona, sog‘liqni saqlash muassasalariga esa 611 ming dona ko‘chat yetkazib berildi. Shuningdek, 6,1 mln tup daraxt koʻchatlarini ekish orqali “yashil belbogʻ”lar tashkil qilindi. 570 ta “yashil bog‘” va “yashil jamoat parklari” ro‘yxati ovozga qo‘yish uchun shakllantirildi. “Ochiq budjet” dasturi orqali 174 ta loyiha g‘olib bo‘ldi. “Yashil makon” platformasi orqali Toshkent shahridagi 337 ming tup daraxt pasportlashtirildi. Tuproq-iqlim sharoitlariga mos bo‘lgan ko‘chatlarni yetishtirish uchun 1 300 gektar maydonda niholxona-ko‘chatxonalar tashkil etilib, 123 mln dona nihol va ko‘chatlar yetishtirilmoqda.

Qolaversa, 130 ming gektar maydonda o‘rmon yaratildi va qayta tiklandi. Orolbo‘yi hududida 126,2 ming gektar o‘rmon barpo etildi. Daraxt va butalarning 746 tonna urug‘lari ko‘chatchilikni rivojlantirish va o‘rmonchilik tadbirlari uchun jamg‘arildi. Tog‘ va adirliklardan iborat 14 ta tumanda 41 gektar maydonda terassa uslubidagi o‘rmonlar yaratildi.

Bundan tashqari, atrof-muhitga ta’sir ko‘rsatuvchi 44 ta sanoat korxonasida 47 ta chang-gaz tozalash uskunalari modernizatsiya qilindi va 2 tasida 2 ta yangi yuqori samarador tozalash uskunasi o‘rnatildi. Respublikada lokal suv oqova suv tozalash inshootlari quriladigan va mavjudlari rekonstruksiya qilinadigan 74 ta atrof-muhitga ta’sir ko‘rsatuvchi I va II toifalarga mansub korxonalar ro‘yxati shakllantirildi. 18 ta korxonada lokal suv tozalash inshootlari qurildi va mavjudlari rekonstruksiya qilindi. Toshkent shahrining 6 ta tumanida 7 ta atmosfera havosi ifloslanishi monitoringi avtomatik stansiyalari o‘rnatildi.

Shu bilan birga, foydali qazilmalarni qazib olish natijasida buzilgan jami 976 gektar yer maydoni rekultivatsiya qilindi. 27 ta qattiq maishiy chiqindi poligonlari rekultivatsiya qilinib, faoliyati to‘xtatildi. 56 ta maishiy chiqindi yig‘ish shoxobchalarini qurish, rekonstruksiya qilish va ta’mirlash ishlari olib borildi.