Yovvoyi tabiatga qarshi jinoyatlar bilan kurashish uchun yangi onlayn platforma taqdim etildi
2025-07-28 10:00:00 / Yangiliklar
Tadbirda Ekologiya vazirligi, Iqtisodiyot va moliya vazirligi huzuridagi Bojxona qo‘mitasi, ilmiy va ta’lim muassasalari, OAV vakillari ishtirok etdi.
Matbuot anjumanini loyihaning O‘zbekiston bo‘yicha rahbari va “Ekomaktab” nodavlat notijorat tashkiloti direktori Natalya Shivaldova ochib berdi. U muammoning dolzarbligiga e’tibor qaratdi.
“Yovvoyi hayvon va o‘simliklarning noqonuniy savdosi xalqaro jinoyatchilikning eng daromadli sohalaridan biriga aylangan. Bu tabiiy ekotizimlarni buzadi, xavfsizlikka putur yetkazadi, iqtisodiyotga zarar keltiradi va zamonaviy, kompleks yondashuvlarni talab etadi”, — dedi u.
Ta’kidlanishicha, yashiltamojnya.uz platformasi bojxona va chegara xizmatlari xodimlariga tezkor yordam ko‘rsatish uchun mo‘ljallangan. Uning yordamida yovvoyi fauna va flora vakillarini tezda aniqlash, ularning CITES konvensiyasi bo‘yicha maqomini tekshirish va zarur ruxsatnomalarning mavjudligini tasdiqlash mumkin. Bu, ayniqsa, hayvonlar yoki ularning qismlari (shox, teri, tish va h.k.) suvenir yoki uy hayvoni sifatida yashirilgan hollarda muhim ahamiyatga ega. Raqamli vositalar inspektorlar ishini samaraliroq qiladi va xato xavfini kamaytiradi.
Loyiha ekspertlari — zoolog Yelena Bykova va ekolog Timur Abduraupov — qonunbuzarliklarning aniq misollarini keltirdilar. Masalan, krokodillar, xameleonlar va pitonlar olib o‘tilishga uringan holatlar aniqlangan. Bunday holatlar muammoning ko‘lamini ko‘rsatibgina qolmay, balki bioxilma-xillikka xavf tug‘diradi va hayvonlarga nisbatan shafqatsiz munosabatni ochib beradi — ular ko‘pincha og‘ir holatlarda tashiladi.
Ishtirokchilar, shuningdek, joylardagi mutaxassislar malakasini oshirish zarurligi hamda aholiga ekologik jinoyatlarning oldini olishga doir targ‘ibot ishlarining ahamiyati haqida fikr almashdilar.
Tadbir davomida Ekologiya vazirligi, "Green University", Atrof-muhitni muhofaza qilish sohasi xodimlarini qayta tayyorlash va malakasini oshirish markazi hamda “Ekomaktab” NNT o‘rtasida hamkorlik to‘g‘risida memorandum imzolandi.
Ushbu hujjat atrof-muhitni muhofaza qilish sohasida strategik hamkorlikni rivojlantirishga qaratilgan. U barqaror rivojlanish maqsadida qo‘shma ta’lim dasturlarini amalga oshirish, chiqindilarni boshqarish tizimini yaxshilash bo‘yicha takliflar ishlab chiqish, havo sifati, bioxilma-xillik va suv resurslarini muhofaza qilish, yoshlar va ayollar tashabbuslarini qo‘llab-quvvatlash, IT yechimlar va innovatsion loyihalarni rivojlantirish, aholining ekologik madaniyatini oshirish, jamoat ekologik inspektorlarini o‘qitish va qo‘llab-quvvatlash, ilmiy tadqiqotlarni rag‘batlantirish hamda xalqaro tajribani hisobga olgan holda ekologik qonunchilikni takomillashtirish jarayonlarini o‘z ichiga oladi.
"Yashil Tamojnya" platformasi taqdimoti O‘zbekistonda va umuman Markaziy Osiyoda ekologik faoliyatni raqamlashtirish yo‘lida muhim qadam bo‘ldi. “Savol-javob” sessiyasi davomida berilgan savollar ishtirokchilar platformasiga befarq emasligini ko‘rsatdi.
Onlayn vositalar, idoralararo hamkorlik va ekspert hamda jamoatchilik faolligini keng jalb etish — ekologik jinoyatlarga qarshi samarali kurash hamda mintaqaning noyob tabiiy merosini asrash uchun muhim hisoblanadi.