O‘zbekiston Respublikasi Ekologiya va iqlim o‘zgarishi milliy qo‘mitasi

Ushbu qonun tashlamalarni tizimli ravishda kamaytirish, uglerod muvozanatini tartibga solish va “yashil” tashabbuslarni rag‘batlantirishga qaratilgan. Qonun olti oydan keyin kuchga kiradi.

Yangi qonunda O‘zbekistonning milliy iqlim siyosatining asosiy tamoyillari belgilab qo‘yilgan, jumladan:

– tashlamalar darajasini kamaytirish sharoitida barqaror iqtisodiy o‘sishni ta’minlash;

– qayta tiklanuvchi energiya manbalaridan foydalanishga ustuvorlik berish;

– O‘zbekistonning issiqxona gazlarini kamaytirish bo‘yicha xalqaro majburiyatlarini bajarish;

– tashlamalar bo‘yicha hisobotlarning majburiyligi va shaffofligini ta’minlash;

– tashlamalarni kamaytirish bo‘yicha maqsadli ko‘rsatkichlarga erishish;

– iqlim choralarini ishlab chiqish va amalga oshirishda ilmiy va tizimli yondashuv.

Qonun yuridik shaxslar, yakka tartibdagi tadbirkorlar hamda jismoniy shaxslarga tashlamalarni kamaytirish va iqlim o‘zgarishiga moslashishga qaratilgan loyihalarni amalga oshirish huquqini beradi. Ushbu loyihalar orqali erishilgan tashlamalarni kamaytirish natijalari davlat tomonidan tan olinadi va milliy uglerod birliklari reyestriga kiritiladi.

Bu “yashil” tashabbuslarni hisobga olish va tasdiqlashning yagona ochiq mexanizmini yaratadi va, ayniqsa, xalqaro hamkorlik va uglerod bo‘yicha hisobot berish kontekstida muhimdir.

Vazirlar Mahkamasiga “yashil” loyihalarni ishlab chiquvchilar va ijrochilarni qo‘llab-quvvatlashga qaratilgan tizimni ishlab chiqish topshirildi. Xususan, loyihalarni tanlash mezonlari, baholash mexanizmlari hamda uglerod birliklarini tasdiqlash tartiblari tasdiqlanadi.

Bundan tashqari, qonunda ichki bozor doirasida uglerod kreditlari savdosidan tushgan mablag‘lar iqlim o‘zgarishiga moslashuv, aylanma (siklli) va “yashil” iqtisodiyotni rivojlantirish, tashlamalarni boshqarish va atrof-muhitni muhofaza qilishning boshqa ustuvor yo‘nalishlariga yo‘naltirilishi belgilangan.

“Issiqxona gazlarining chiqarilishini  cheklash to‘g‘risida”gi Qonunning qabul qilinishi O‘zbekistonning ekologik xavfsiz va barqaror iqtisodiyotga intilayotganini hamda global iqlim o‘zgarishiga qarshi kurashda faol ishtirok etayotganini yana bir bor isbotlaydi.