O‘zbekiston Respublikasi Ekologiya va iqlim o‘zgarishi milliy qo‘mitasi

Seminar davomida NDC3.0 loyihasining asosiy jihatlari taqdim etildi. Jumladan, energetika, sanoat, transport va chiqindilarni boshqarish kabi sohalarda issiqxona gazlari chiqindilarini kamaytirish bo‘yicha choralar muhokama qilindi. Shuningdek, qishloq xo‘jaligi, suv resurslari va sog‘liqni saqlash sohalarida iqlim o‘zgarishiga moslashish bo‘yicha ustuvor yo‘nalishlar ko‘rib chiqildi.

“Milliy miqyosda belgilanadigan hissalarni yangilash – bu shunchaki raqamlar va ko‘rsatkichlarni qayta ko‘rib chiqish emas, balki mamlakatimizning barqaror kelajagiga yo‘naltirilgan strategik qadamdir. Biz O‘zbekistonning iqlim siyosatida ilmiy asoslar bilan bir qatorda jamoatchilik fikri ham inobatga olinishini istaymiz. Bu jarayonga davlat organlaridan tortib, fuqarolik jamiyati va nodavlat sektorgacha bo‘lgan barcha asosiy ishtirokchilar jalb qilinishi muhim”, – deya ta’kidladi Iqlim o‘zgarishi bo‘yicha milliy markaz mutaxassislari.

Xalqaro miqyosda tobora dolzarb ahamiyat kasb etayotgan tabiiy yechimlarni integratsiya qilish masalasiga alohida e’tibor qaratildi. Jahon banki ma’lumotlariga ko‘ra, tabiiy yechimlarning keng miqyosda joriy etilishi 2030-yilga borib global issiqxona gazlari chiqindilarini zarur darajada 37 foizgacha kamaytirishga imkon beradi.

O‘zbekistonning milliy iqlim maqsadlarini yangilash global darajadagi iqlim majburiyatlarini kuchaytirish bo‘yicha harakatlar doirasida amalga oshirilmoqda. BMT ma’lumotlariga ko‘ra, 2015-yilda Parij bitimi imzolanganidan so‘ng 150 dan ortiq davlat o‘z milliy hissalarini kuchaytirgan yoki yangilagan (UNFCCC NDC Registry).

Muhokamalar davomida ishtirokchilar iqlim siyosatini ishlab chiqishda gender va ijtimoiy omillarni hisobga olish zarurligini ta’kidladilar. Xususan, fuqarolik jamiyati institutlari va nodavlat notijorat tashkilotlarini (NNT) iqlim tashabbuslarini amalga oshirishga, loyihalarni monitoring qilish, bajarish va aholining xabardorligini oshirishda faol jalb etish muhimligi alohida qayd etildi.

“Bugungi kunda O‘zbekiston iqlim islohotlariga jiddiy e’tibor qaratayotganini namoyon qilmoqda. Iqlim majburiyatlarini ishlab chiqish va amalga oshirishda, ayniqsa, eng zaif qatlamlarni ham qamrab oladigan inklyuziv yondashuv muhim ahamiyatga ega. BMTTD O‘zbekistonni barqaror rivojlanishga o‘tish jarayonida qo‘llab-quvvatlashda davom etadi”, — deya ta’kidladi BMT Taraqqiyot dasturining O‘zbekistondagi vakolatxonasi.

NDC3.0 loyihasi kelgusi yillarda O‘zbekistonning iqlim siyosatini amalga oshirishda asosiy hujjat bo‘ladi va mamlakatning Parij bitimi doirasidagi xalqaro majburiyatlari asosida xalqaro maydonda taqdim etiladi.