O‘zbekiston Respublikasi Ekologiya va iqlim o‘zgarishi milliy qo‘mitasi

2025-yilning birinchi yarmida vazirlik Vaziyatlar markazi tomonidan o‘rnatilgan onlayn kuzatuv kameralari yordamida belgilanmagan joylarga chiqindi tashlash bilan bog‘liq 5215 ta holat qayd etilgan.

Ma’lumot uchun, Respublikada 250 ta onlayn kuzatuv kameralari o‘rnatilgan bo‘lib, ular ekologik huquqbuzarliklar, xususan, qattiq maishiy, qurilish va suyuq chiqindilarni ruxsat etilmagan joylarga noqonuniy tashlash bilan bog‘liq holatlarni o‘z vaqtida aniqlash imkonini beradi. Videokuzatuv tizimi chiqindi eng ko‘p tashlanadigan joylar, jumladan, aholi punktlarining chekka hududlari, ruxsat etilmagan poligonlarni, qirg‘oqbo‘yi va jamoat joylarini qamrab oladi.

Eng ko‘p huquqbuzarliklar Namangan viloyatida (1563 ta), Andijon viloyatida (1443 ta) va Farg‘ona viloyatida (1163 ta holat) qayd etilgan.

Huquqbuzarliklar yuzasidan O‘zbekiston Respublikasi Ma’muriy javobgarlik to‘g‘risidagi kodeksining 91-moddasi 1-qismiga ko‘ra (qattiq maishiy va qurilish chiqindilarini ko‘mish, shuningdek, suyuq maishiy chiqindilarni ruxsat etilmagan joylarga tashlash) respublika bo‘yicha jami 14 728 ta ma’muriy bayonnomalar tuzildi. Jarimalarning umumiy miqdori 7,9 milliard so‘mni tashkil etib, shundan 3,3 milliard so‘mi belgilangan tartibda undirib olindi.

Ekologiya vazirligi barcha fuqarolarni qonunchilik talablariga qat’iy rioya qilishga, atrof-muhitga mas’uliyat bilan munosabatda bo‘lishga chaqiradi. Chiqindilarni faqat maxsus belgilangan joylarga tashlash lozim. Faqat birgalikdagi sa’y-harakatlar bilan mamlakatimiz musaffoligi, ekologik farovonligi va barqaror rivojlanishini ta’minlashimiz mumkin.