Tadbirda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazir o‘rinbosari Jusipbek Kazbekov, Buyuk Britaniyaning O'zbekistondagi elchisi Timoti Smart, Buyuk Britaniya Lordlar palatasi mustaqil vakili Lord Uaverley va boshqalar ishtirok etdi.

Tadbirda nutq so‘zlagan Jusipbek Kazbekov O‘zbekistonda Prezident Shavkat Mirziyoyev tashabbusi bilan dolzarb ekologik masalalar, xususan, Orol dengizi muammosiga qarshi kurash maqsadida ko‘plab ishlar amalga oshirilayotganligini ta'kidladi.

"O‘zbekiston ekologik vaziyatni barqarorlashtirish, iqlim o‘zgarishlari oqibatlarini yumshatish, cho‘llanishga qarshi kurash va boshqa dolzarb masalalar borasida ko‘plab ishlarni amalga oshirmoqda. Xususan, O‘zbekiston BMTning Cho‘llanishga qarshi kurash to‘g‘risidagi konvensiyasi ijrosini ko‘rib chiqish qo‘mitasining 21-sessiyasi (CRIC 21), Samarqand Iqlim forumi kabi muhim xalqaro tadbirlarga mezbonlik qildi, — dedi Jusipbek Kazbekov. — Shuningdek, "Yashil makon" umummilliy loyihasi doirasida cho‘lga chidamli, iqlimga mos daraxtlar ekilishi natijasida Orol dengizining qurigan tubi ko‘kalamzorlashtirilmoqda. Barqaror ekologik rivojlanish, yashil iqtisodiyotga o‘tish, xususan, qayta tiklanadigan energiya hajmini 54 foizga yetkazish qat'iy maqsad qilib belgilab olingan. Bundan tashqari, 2025-yil "Atrof-muhitni asrash va "yashil iqtisodiyot" yili" deb e'lon qilindi".

Jusipbek Kazbekov nutqi yakunida tadbir ishtirokchilarini 2025-yil 24-noyabrdan 5-dekabrgacha Samarqand shahrida o‘tkaziladigan yoʻqolib ketish xavfi ostida turgan yovvoyi fauna va flora turlarining xalqaro savdosi toʻgʻrisidagi konvensiya tomonlar konferensiyasining 20-yigʻilishida  (CITES COP20) ishtirok etishga taklif qildi.

Timoti Smart O‘zbekistonda yashil iqtisodiyotni rivojlantirishga sarmoya kiritish Buyuk Britaniya uchun muhim ahamiyat kasb etishini ta'kidladi. 

"O‘zbekistonda suv resurslaridan oqilona foydalanish, yerlarning degradatsiyaga uchrashiga yo‘l qo‘ymaslik, iqlim o‘zgarishlarining oldini olishga qaratilgan loyihalar biz uchun katta ahamiyatga ega. Maqsadimiz ekologik vaziyatni yaxshilash, xususan, Orol fojiasiga qarshi kurash va aholi turmush darajasini yaxshilash borasida muvaffaqiyatlarga erishishdir", — dedi elchi. 

Lord Uaverley esa O‘zbekistonning xalqaro imiji tobora yaxshilanib borayotganligiga to‘xtaldi.

"So‘nggi yillarda O‘zbekistonda Prezident tomonidan katta o‘zgarishlar qilinmoqda. Davlat va tashkilotlarning global reytingini oshirishga e'tibor qaratilmoqda. Buning natijasi o‘laroq mamlakat reytingi sezilarli darajada oshdi, xorijiy ommaviy axborot vositalarida O‘zbekiston haqida juda ko‘p ijobiy maqolalar chop etilmoqda, — dedi Lord Uaverley. — Ayniqsa, Orolbo'yi hududida olib borilayotgan sa'i harakatalr, mintaqadagi tuproq sifatini yaxshilash hamda yer degradatsiyasining oldini olish bo‘yicha amalga oshirilayotgan ishlar O‘zbekistonning barqaror kelajak sari qat’iy intilayotganini yaqqol ko‘rsatadi".

Tadbir yakunida O‘zbekiston global mintaqaviy muammoga aylangan Orol dengizi masalasini hal qilish bo‘yicha sa'y-harakatlarni izchil davom ettirishi hamda bu boradagi tashabbuslar doimiy qo‘llab-quvvatlanishi ta'kidlandi.