O‘zbekiston Respublikasi Ekologiya va iqlim o‘zgarishi milliy qo‘mitasi

Festival 2000 dan ortiq mahalliy va xalqaro yoshlarni birlashtirdi. Ishtirokchilar ikkinchi hayot bag‘ishlangan narsalar, xususan, plastik idishlar, kiyim-kechak, qog‘oz chiqindilari, ishlatilgan batareykalar va o‘yinchoqlardan chipta o‘rnida foydalanishdi. Shuningdek, 100 nafardan ortiq volontyorlar ekologik turmush tarziga namuna ko‘rsatishdi: o‘z qo‘llari bilan eski futbolkalardan foydali narsalar yasashdi, bir martalik idishlardan voz kechishdi, birorta ham banner ishlatilmadi, barcha bezaklar qo‘lbola usulda keraksiz qutilardan tayyorlandi.

Bundan tashqari, festivalga tashrif buyurganlar uchun brendlar yarmarkalari, mahalliy ekologik loyihalar ko‘rgazmalari, mahorat darslari va ijodiy hududlar tashkil qilindi. Shu bilan birga, chiqindilarni qayta ishlash, muqobil energiya va barqaror iste’mol sohalarida innovatsion yechimlarni namoyish etuvchi zamonaviy eko-loyihalar va startaplarga alohida e’tibor qaratildi. 

Qolaversa, bir yil davomida 10 nafar talabaning eko-klubini qo‘llab-quvvatlashni ko‘zda tutuvchi volontyorlar jamiyati loyihasi ishga tushirildi.

Festivalda “Clean Games Uzbekistan” ekologik o‘yini g‘oliblari, “Qahramonlar davri” loyihasi doirasidagi yoshi kichik, biroq ahamiyati katta bo‘lgan eko-qahramonlar, shuningdek, rasmlar va qo‘l mehnati tanlovi ishtirokchilari ham taqdirlandi. Jumladan, “Qush inlarini yasash” tanlovida 1-o‘rinni Biloliddin Hakimjonov, 2-o‘rinni Madina Oslonbekova, 3-o‘rinni Omina Sodiqova, “Tabiat bolalar nigohida” rasm chizish tanlovida 1-o‘rinni Muslima G‘aybullayeva, 2-o‘rinni Aziza Qodirova, 3-o‘rinni Imron Komiljonovlar qo‘lga kiritdi. Shu bilan bir qatorda, taniqli yosh rassom Sardor Nugmanov tomonidan ishtirokchilar bilan mahorat darsi tashkil etildi. Yakunda mahalliy va xorijlik san’atkorlar ishtirokida konsert dasturi, raqs ansambli, faxriy qorovulning ko‘rgazmali chiqishlari va O‘zbekiston yoshlar ittifoqining bolalar sport markazi tomonidan sahna ko‘rinishlari taqdim etildi.
 
“Eco Ritm” eko-festivali jamoatchilik, davlat va xalqaro tashkilotlar vakillari, shuningdek, shahar aholisini barqaror va ekologik toza turmush tarzini targ‘ib qilish bo‘yicha samarali muloqot va hamkorlikdagi harakatlarga jalb etishga xizmat qiladi.