O‘zbekiston Respublikasi Ekologiya va iqlim o‘zgarishi milliy qo‘mitasi

Uchrashuv davomida Pan Gi Mun O'zbekistonda Prezident Shavkat Mirziyoyev rahbarligida atrof-muhitni muhofaza qilish va iqlim o'zgarishi sohasida olib borilayotgan keng ko‘lamli islohotlar, xususan, Orolbo‘yi mintaqasida amalga oshirilayotgan loyihalarga katta qiziqish bildirdi. Orol dengizi qurigan tubining 2 million gektar maydonini yashillashtirish tashabbusi, shuningdek, 2030-yilga borib yashil hududlarni 30 foizga yetkazish maqsad qilingan “Yashil makon” umumxalq loyihasiga alohida e’tibor qaratdi.

Yuqori martabali mehmon O'zbekistonning barqaror rivojlanish masalalaridagi yetakchilik pozitsiyasini yuksak baholab, respublika Markaziy Osiyoda Global yashil o'sish institutiga a’zo bo‘lgan birinchi davlat bo‘lganini ta'kidladi. Bu esa, uning so‘zlariga ko‘ra, mintaqadagi boshqa davlatlarning ham ushbu tashkilotga qo‘shilishiga turtki bo‘lgan.

Uchrashuv yakunida ekologik kun tartibini ilgari surishga qo‘shgan hissasi va xizmatlari e’tirofi sifatida Aziz Abduhakimov Pan Gi Munga “Tabiat himoyachisi” ko‘krak nishonini topshirdi.

O‘z navbatida, esdalik sovg‘asi sifatida vazirga Pan Gi Mun tomonidan yozilgan “Bo‘lingan dunyoda millatlarni birlashtirish: Konsensus sari murakkab yo‘l” nomli kitob taqdim etildi.

Mazkur uchrashuv O‘zbekistonning atrof-muhitni muhofaza qilish va iqlim o‘zgarishiga qarshi kurashish sohasida xalqaro hamkorligi mustahkamlanib borayotganining yana bir isboti bo‘ldi.