O‘zbekiston Respublikasi Ekologiya va iqlim o‘zgarishi milliy qo‘mitasi

Gibrid formatda o‘tkazilgan tadbirda vazirlik va idoralar, xalqaro moliya institutlari, ikki tomonlama donorlar, BMT agentliklari va fuqarolik jamiyati tashkilotlari vakillari ishtirok etdi.

Uchrashuv NDC 3.0 ni ishlab chiqishdagi yutuqlar bilan tanishish, oshkoralik va hisobot (ICTU) talablariga javob beradigan majburiy bo'limlarni taqdim etish va iqlim maqsadlari hamda O'zbekistonning Barqaror rivojlanish maqsadlari (BRM) o'rtasidagi bog'liqlikni vizuallashtirish uchun innovatsion vositani taqdim etish maqsadida o‘tkazildi.

Iqlim o‘zgarishi milliy markazi direktori Farrux Sattarov real va ilmiy asoslangan yondashuvlar zarurligini ta’kidladi. 

"Biz NDC 3.0ni ishlab chiqishda aniq tushunamizki, iqlim maqsadlariga erishish uchun nafaqat katta istaklar, balki haqiqatga mos, ilmiy asoslangan amalga oshirish mexanizmlari kerak. Faqat davlat organlari, xalqaro hamkorlar va fuqarolik jamiyati bilan yaqin hamkorlikda  O‘zbekiston uchun barqaror kelajakni ta’minlashimiz mumkin”, — dedi u.

O‘zbekistondagi BMTning doimiy koordinatori Sabina Mаhl iqlim islohotlari jarayonini qo‘llab-quvvatlashda BMT tizimining birgalikdagi rolini qayd etdi.

“BMT tizimi NDC 3.0 doirasida O‘zbekistonning iqlim borasidagi maqsadlarini yanada kuchaytirish uchun muvofiqlashtirilgan, sohalararo qo‘llab-quvvatlashga tayyor. BMT agentliklarining to‘liq salohiyatidan foydalanib va xalqaro tashkilotlar bilan kelishilgan hamkorlik o‘rnatib, biz 1,5°C issiqlik o‘sishini cheklash maqsadiga mos adolatli va inklyuziv o‘tishni tezlashtira olamiz”, — dedi Mahl.

Tadbir davomida NDC 3.0 tayyorlash jarayoniga oid texnik yangilanishlar, jumladan, Milliy gidrometeorologiya instituti va Milliy iqlim o‘zgarishi markazi ekspertlarining hisobotlari taqdim etildi. BMTTD jamoasi iqlim va barqaror rivojlanish maqsadlarini integratsiyalash bo‘yicha umumiy tahliliy hisobot hamda onlayn vizuallashtirish platformasini namoyish etdi.

BMTTDning O‘zbekistondagi doimiy vakili Akiko Fujii o‘z nutqida iqlim siyosatini barqaror rivojlanish dasturi bilan muvofiqlashtirish muhim ahamiyatga ega ekanligini ta’kidladi. 

“NDC 3.0ni ishlab chiqish — bu nafaqat iqlim majburiyati, balki barqaror rivojlanish ustuvorliklarini iqlim o‘zgarishi bilan kurash choralariga moslashtirish imkoniyatidir. BMTTD O‘zbekistonga ambitsiyali va inklyuziv iqlim yechimlarini ilgari surishda, barqaror o‘sish, bandlik va oziq-ovqat xavfsizligini ta’minlashda keng qamrovli yordam ko‘rsatishni davom ettiradi”, — dedi u.

Tadbir yakunida Jahon banki, UNICEF, Osiyo Taraqqiyot Banki (OTB), Yevropa tiklanish va taraqqiyot banki (YTTB), GIZ va boshqa rivojlanish hamkorlari NDC 3.0 tayyorlash jarayonini qo‘llab-quvvatlash bo‘yicha takliflari va rejalarini taqdim etdilar.

Tadbir yakunida O‘zbekistonning iqlim siyosatida shaffoflik, inklyuzivlik va ilmiy asoslangan yondashuv tamoyillariga sodiqligi yana bir bor tasdiqlandi. NDC 3.0ning yangilangan versiyasi 2025-yilda Braziliyada bo‘lib o‘tadigan BMTning Iqlim o‘zgarishiga doir doiraviy konvensiyasi tomonlarining 30-konferensiyasida (COP30) taqdim etilishi rejalashtirilgan.