O‘zbekiston Respublikasi Ekologiya va iqlim o‘zgarishi milliy qo‘mitasi

Ushbu nufuzli tadbirda Markaziy Osiyo va boshqa mintaqalardan taxminan 250 nafar ishtirokchi — hukumatlar, xalqaro tashkilotlar, ilmiy va biznes doiralari, fuqarolik jamiyati vakillari va yoshlar mintaqaning iqlimga chidamliligini oshirish maqsadida birlashdi. 

Tadbir “Turkmanistonning nodir endemik flora va faunasi bilan tanishuv” ko‘rgazmasi bilan boshlandi. Bu ko‘rgazma mamlakatning noyob ekotizimlarini asrab-avaylash muhimligini yoritishga qaratilgan.

“Iqlimni moliyalashtirish sohasidagi global maqsadlarga mintaqaviy va milliy harakatlar orqali erishish” shiori ostidagi tadbir xalqaro moliyaviy resurslarni safarbar etish va mintaqaviy hamkorlik masalalari yuzasidan ochiq muloqot maydoniga aylandi.

"2025-yil — Parij bitimining barcha tomonlari, jumladan, O‘zbekiston Respublikasi uchun ham muhim bosqich hisoblanadi. Aynan hozirgi paytda bizning oldimizda Milliy darajada belgilangan hissalar (MDBH)ni taqdim etishning yangi davri doirasida milliy majburiyatlarni yangilash va kuchaytirish vazifasi turibdi. O‘zbekiston Respublikasi iqlim o‘zgarishiga qarshi kurashish va barqaror rivojlanish bo‘yicha global sa’y-harakatlarni qo‘llab-quvvatlagan holda, yangilangan MDBH 3.0’ni taqdim etishga tayyorgarlik ko‘rmoqda. Ushbu hujjatda mamlakatning iqlimga oid strategik ustuvor yo‘nalishlari hamda uzoq muddatli istiqboldagi yanada muhim majburiyatlari o‘z aksini topadi", – dedi F. Sattarov tadbir ochilishida.

Konferensiya doirasida quyidagi asosiy muhokamalar bo‘lib o‘tdi:

🔹 1-panel sessiya: Markaziy Osiyo uchun iqlim moliyalashtirish. Mavjud moliyaviy vositalar — yashil obligatsiyalar, aralash moliyalashtirish kabi instrumentlar yordamida keyingi besh yilda mintaqada iqlim investitsiyalarini 25 foizga oshirish masalalari muhokama etildi. Bu sessiyada Buyuk Britaniya, Yevropa Ittifoqi, GIZ, Italiya va Qirg‘iziston mutaxassislari ma'ruza qildi.

🔹2-panel sessiya: Mintaqaviy hamkorlik va iqlim adolati. Gidrologik ofatlar haqida erta ogohlantirish tizimlari, transchegaraviy tashabbuslar, shuningdek, milliy hissalarni (ONUV 3.0) mustahkamlash borasida fikr almashildi.

🔹 Parallel sessiyalar: iqlim texnologiyalarini uzatish bo‘yicha “Yashil ko‘prik” tashabbusi, innovatsion moliyaviy vositalar, fuqarolik jamiyati va yoshlarning roli, shuningdek, RESILAND CA+ dasturini muvofiqlashtirish borasidagi muhokamalarga e'tibor qaratildi.

Mazkur anjuman Markaziy Osiyo davlatlari o‘rtasidagi hamkorlikni chuqurlashtirish, bilim va tajriba almashish, iqlim inqiroziga qarshi kurashish va uglerod neytralligi maqsadlariga erishish borasida umumiy ustuvorliklarni belgilash uchun muhim maydon bo‘lib xizmat qiladi.