O‘zbekiston Respublikasi Ekologiya va iqlim o‘zgarishi milliy qo‘mitasi

Mazkur ko‘rgazma “Eski shahar” timsolini jonli, murakkab va ko‘p qirrali madaniy hodisa sifatida talqin etadi. Asarlarda milliy urf-odatlar bilan zamonaviy-badiiy ifoda vositalarining o‘zaro uyg‘unligi aks ettirilgan.

Dilorom Mamedovaning ijodi rangbarang va iliqlikka yoʻgʻrilgan: uning kartinalarida o‘zbek mahallalari, tor ko‘chalar va tarixiy inshootlar jonlanadi. Janrli lavhalar, manzaralar va portretlarda muallifning ona yurti va uning ruhiyatiga bo‘lgan chuqur mehr-muhabbati yaqqol seziladi.

Dilmurod Yo‘ldoshev esa o‘z asarlarida sokinlik, kamtarona hayot go‘zalligi va ichki osoyishtalik aks etgan manzaralarni tasvirlaydi. Uning asarlari go‘yoki o‘tkinchi tuyg‘ular va lahzalarni o‘zida jamlaydi, tomoshabinga ichki holatini mushohada qilish imkonini beradi.

Abduhakim Karimov sharqona miniatyura an’analarini akademik rassomlik bilan umumlashtirgan. Uning asarlarida sharq falsafasi, klassik she’riyat va madaniy meros bilan yo‘g‘rilgan chuqur g‘oyalar mujassam. Bu kartinalar tomoshabinni fikr yuritishga, tafakkur qilishga undaydi.

"Artera Studio"ning ochilishi poytaxt madaniy hayotida muhim voqea bo‘ldi. Bu oddiy galereya emas, balki mashhur va ijodini endigina boshlayotgan rassomlar ishtirokida ko‘rgazmalar, rasm chizish va kulolchilik bo‘yicha mahorat darslari, shuningdek, kattalar va bolalar uchun ta’lim dasturlari o‘tkaziladigan to‘laqonli ijodiy platformadir. Mazkur maskan zamonaviy o‘zbek san’atiga qiziquvchilar, estetik zavq izlovchilar va badiiy tafakkurga ega bo‘lgan auditoriya uchun yangi ijodiy markazga aylanishi kutilmoqda. 

“Eski shahar” — nafaqat badiiy ko‘rgazma, balki, shahar xotirasi, vaqt va obrazlar o‘rtasidagi bog‘liqlikni anglashga qaratilgan badiiy tadqiqotdir. Ko‘rgazma orqali tomoshabin tanish manzaralarga yangi nigoh bilan qarash, o‘tmishning bugungi kundagi aksini ko‘rish va milliy an’analar zamonaviy san’at tilida qanday talqin etilayotganini his etish imkoniyatiga ega bo‘ladi.

Ko‘rgazma har kuni soat 9:00 dan 17:00 gacha ochiq.
Manzil: Toshkent shahri, Mirzo Ulug‘bek tumani, Hamid Alimjon maydoni.
Kirish bepul.