1-aprel — Xalqaro qushlar kuni
2025-04-01 11:00:00 / Yangiliklar
Mamlakatimizda qushlar populyatsiyasini o‘rganish, saqlash va tiklash bo‘yicha faol ishlar amalga oshirilmoqda. Noyob va yoʻqolib ketish xavfi ostidagi turlarni monitoring qilish dasturlari amalga oshirilmoqda, muhofaza etiladigan tabiiy hududlar kengaytirilmoqda, aholi oʻrtasida targ‘ibot ishlari olib borilmoqda.
O‘zbekistonning 5 ta suv-botqoq yerlari Ramsar ro‘yxatiga – ko‘plab qush turlari, jumladan, noyob va yo‘qolib ketish xavfi ostida turgan qushlarning asosiy yashash joylari bo‘lgan xalqaro ahamiyatga ega hududlar ro‘yxatiga kiritilgani muhim yutuq hisoblanadi. Bu obyektlar: Dengizko'l ko'li (2001), Arnasoy ko'llar tizimi (2008), To'dako'l va Quyimozor suv omborlari (2020), Sudochye (2023) va Jiltirbas ko'llari (2024).
Mazkur tabiiy hududlar ko'plab qush turlari, jumladan, pushti flamingolar, saqoqushlar, skopalar, qizil tomoq kazarkalar va qushlar dunyosining boshqa noyob vakillari uchun muhim maskan, qishlash va ko'chib o'tish joylari bo'lib xizmat qiladi.
Qushlar ekotizimimizning ajralmas qismidir. Ular tuproqni zararkunandalardan tozalash, o'simlik urug'larini tarqatishda muhim ahamiyatga ega, shuningdek, sayrashi bilan zavq bag‘ishlaydi. Ammo ko'plab turlar yashash joylarini yo'qotish, ifloslanish va brakonyerlik tufayli yo'q bo'lib ketish xavfi ostida. Biz qilayotgan har bir harakat muhim ahamiyatga ega. Mamlakatimiz tabiiy merosiga g‘amxo‘rlik qilish qushlar va ularning yashash joylarini asrab-avaylashga xizmat qiladi.