Yirtqich qushning noqonuniy savdosi to‘xtatildi
2025-03-27 17:10:00 / Yangiliklar
Qashqadaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi xodimlari tomonidan fuqaro Sh.M. ijtimoiy tarmoqlar orqali ovchi qush noqonuniy sotilayotganligi aniqlandi.
Boshqarma xodimlari holatga chek qo‘yish maqsadida fuqaro bilan "xaridor" sifatida bog‘lanishdi va qushni sotib olishga kelishishdi. Belgilangan joyda Sh.M. kelishilgan pulni sanab olib, xodimlarga qushni berayotganida ashyoviy dalillar bilan ushlandi.
Qush vaziyatga to‘liq oydinlik kiritilgunga qadar Shahrisabz shahridagi hayvonot bog‘iga vaqtincha topshirildi. Shuningdek, qushning turiga aniqlik kiritish uchun hujjatlar Fanlar akademiyasiga yuborildi. Fanlar akademiyasining xulosasiga asosan zarar miqdori belgilanadi va huquqbuzarga tegishli chora ko‘riladi.
Ma'lumot uchun, avvalroq Toshkent shahri va Farg‘ona viloyatida ham qushlarning noqonuniy savdosiga chek qo‘yilgandi.