Ekologik ekspertiza xulosasini olmagan korxona faoliyati to'xtatildi
2025-03-03 15:00:00 / Yangiliklar
Tekshirish jarayonida ohak pishirish pechida tabiiy gaz yonishidan hosil bo‘ladigan moddalarni ushlab qoluvchi chang-gaz tozalash uskunasi (filtr) yaxshi ishlamasligi, buning natijasida atmosferaga tashlanayotgan tashlamalar miqdori me’yoridan ortiqcha ekanligi aniqlandi va korxona rahbariga nisbatan O‘zbekiston Respublikasi MJtKning 86-moddasi 1-qismi bilan bazaviy hisoblash miqdorining 3 (uch) barobari miqdorida ma’muriy jarima qo‘llanildi.
Biroq korxona rahbari ushbu choradan keyin ham tegishli xulosa chiqarmadi, ya'ni chang-gaz tozalash uskunalarini yangisi bilan almashtirmadi va aholining noroziligiga sabab bo’ldi. “ShANS” ma’suliyati cheklangan jamiyati yuborilgan talabnomani ham e’tibordan chetda qoldirdi.
O‘zbekiston Respublikasi “Tabiatni muhofaza qilish to‘g‘risida”gi Qonunining 25-moddasiga muvofiq, davlat ekologik ekspertizasining ijobiy xulosasini olmagan korxona va tashkilotlarning faoliyat yuritishlari mumkin emas.
Qonun talablariga bo‘ysunmaganligi, davlat ekologik ekspertizasi ijobiy xulosasini olmasdan faoliyat yuritib kelayotganligi uchun Xo'jaobod tumanida joylashgan “Shans” MChJ faoliyati Xo'jaobod tumanlararo iqtisodiy sudi qaroriga asosan ekspertizaning ijobiy xulosasini olgunga qadar vaqtinchalik to‘xtatildi.