Oʼzbekiston va Turkiya oʼrtasida turizm sohasida Kelishuv va Harakatlar rejasi imzolandi
2025-02-27 16:00:00 / Yangiliklar
Uchrashuvda Аziz Аbduhakimov oxirgi yillarda ikki davlat rahbarlari tashabbusi bilan turizm sohasida katta yutuqlarga erishilayotganligini, sayyohlar oqimi yildan-yilga ortib borayotganligini taʼkidladi.
Maʼlumot uchun, Oʼzbekistonga turizm maqsadida kelgan Turkiya fuqarolari soni 2018-yilda 41 299, 2019-yilda 63 539, 2021-yilda 44 168, 2022-yilda 75 559, 2023-yilda 106 516, 2024-yil 149 146 nafarni tashkil qildi. Turkiyaga kelgan Oʼzbekiston fuqarolari soni esa 2021-yilda 170 636, 2022-yilda 305 831, 2023-yilda 187 749, 2024-yilda 229 968 nafarga teng boʼldi. Oʼz navbatida aviareyslar qamrovi va oqimi ham keskin oʼsdi. Bugungi kunda haftasiga 106 ta aviareys yoʼlga qoʼyilgan (2023-yilda bu koʼrsatgich 62 ta, 2022-yilda – 20 ta, 2021-yilda 10 ta reysni tashkil qilgan).
Uchrashuvda ikki tomonlama hamkorlikni yanada kengaytirish muhim ekanligi taʼkidlandi.
“Biz bugungi mavjud yoʼnalishlarni kengaytirgan holda Oʼzbekistonning turizm maskanlarini Turkiyaning yirik turizm markazlari — Izmir, Mugla, Fethie, Аlaniya, Аdana, Bursa kabilar bilan loukosterlarni jalb qilgan holda oʼzaro bogʼlamoqchimiz. Imkoniyatlarni toʼliq ishga solish uchun aviareyslarni 3 baravar oshirish zarur, — dedi А. Аbduhakimov. — Shuningdek, har bir tomonga kamida bir million nafardan turistlarni olib kelishni koʼzda tutadigan “Million+million” dasturini ishga tushirishni taklif qilamiz”.
Uchrashuvda quyidagi takliflar ilgari surildi:
— Turizm maskanlarini bogʼlaydigan aviaqatnovlarni koʼpaytirish;
— Oʼzbekistonda Turkiyaning va Turkiyada Oʼzbekistonning turizm salohiyatini yanada kengroq targʼib qilish;
— Moturidiy, Naqshbandiy va Buxoriy tariqatlari izdoshlarining Turkiya markaziy va sharqiy provintsiyalarida istiqomat qiladigan yirik jamoalarini (umumiy 3 mln atrofida) Oʼzbekistonga kengroq jalb etish, muzeylar oʼrtasida hamkorlikni kengaytirish, madaniy tadbirlarni koʼpaytirish;
— “Turk qardoshlar” dasturini amalga oshirish, davlatlarimiz tarixini oʼzaro chuqurroq oʼrganish, hamkorlikda kino asarlari yaratish;
— Oʼzbekistonda jadal rivojlanib borayotgan turizm yoʼnalishlari – ekoturizm, ekstremal turizm, ziyorat turizmiga bagʼishlangan tematik koʼrgazmalar, foto-koʼrgazmalar tashkil qilish;
— Turkiyalik sayyohlarning Buxorodagi 7 ta Pir ziyoratgohlariga sayohatlarini yoʼlga qoʼyish;
— Turkiya muzeylarida Oʼzbekiston muzey eksponatlari burchaklarini yaratish;
— Turkiyaning yirik sanʼat dargohlari, park va bogʼlarida Oʼzbekiston tomonidan YuNESKO nomoddiy madaniy meros roʼyxatiga kiritilgan baxshichilik, maqom sanʼati va lazgi raqsi namoyishlari, madaniy festivallar va “open-air” tadbirlarini oʼtkazish;
— turkiyaliklar uchun, ularning talab va istaklariga mos turistik mahsulotlar yaratish maqsadida turoperatorlar, restoratorlar, turizm infrastrukturasiga sarmoya kiritadigan kompaniyalarni Oʼzbekistonga jalb qilish;
— aeroportlarda, mehmonxona, kafe va restoranlarda turk tilida koʼrsatkich belgilarini oʼrnatish, menyular yaratish, turk turistlariga moslashtirilgan (tailor-made) marshrut, ekskursiya va turlar hamda davlatlar kulinariyasini birlashtirgan restoranlar tashkil qilish;
— Turizmning turli sohalari boʼyicha oʼzaro tajriba almashish.
Oʼz navbatida Mehmet Nuri Ersoy Oʼzbekiston tomonidan bildirilgan barcha tashabbuslarni qoʼllab-quvvatlanishini bildirdi.
“Oʼzbekiston tarixiy va madaniy boyliklari bilan dunyodagi eng muhim sayyohlik yoʼnalishlaridan biri hisoblanadi. Samarqand, Buxoro va Xiva kabi betakror shaharlar nafaqat Markaziy Osiyo, balki butun dunyo madaniy merosida muhim oʼrin tutadi. Bundan tashqari, oʼzbek taomlari, anʼanaviy hunarmandchilik va mehmondoʼstlik kabi noyob tajribalar Oʼzbekistonning turizm sohasidagi jozibadorligini yanada oshirmoqda”, — dedi Mehmet Nuri Ersoy.
Maʼlumot uchun, Oʼzbekistonda Turkiya bilan hamkorlikda 12 ta mehmonxona va turistik obʼektlar mavjud (“International”, “Wyndham”, “Intercontinental”, “Calik Energy”, “Piramit Tower”, “Sarikoc Holding” va boshqalar. Shuningdek, yurtimizda turkiyalik hamkorlar bilan birgalikda 100 dan ortiq restoranlar tashkil qilingan.
2025-2026 yillarda esa turk sarmoyasi koʼmagida Buxoro, Samarqand, Jizzax, Fargʼona va Toshkent viloyatlarida umumiy 167,9 mln dollarlik 11 ta mehmonxona loyihalarini amalga oshirish rejalashtirilgan.